[A:༧༡ན]སྟོན་པ་སྔོན་དུ་ཐབས་གོམས་པས་རྒྱུ་སྨིན་དགོས་པ་ཡིན་གསུངས་ནས་ཐོག་མར་སྐྱབས་འགྲོ་དང་། བྱམས་སྙིང་རྗེ་ནས་རིམ་གྱིས་ཁྲིད་དེ་ཆོས་མང་དུ་གསན་ནོ། །དེ་ནས་སྤྱན་སྔ་སྐུ་མཚམས་ལ་བཞུགས་པས། རྣལ་འབྱོར་པས་མཇལ་སྣ་མཛད་དེ་ཆོས་གསན། རྩ་བའི་བླ་མ་ཞུས། དེ་ནས་རྣལ་འབྱོར་པ་ལོ་དགུ། དགོན་པ་བ་ལོ་ལྔ་བསྟེན། སྤྱན་སྔ་ལོ་བདུན་འབྲལ་མེད་དུ་བསྟེན་ཏེ་བཀའ་གདམས་ཀྱི་ཆོས་ཐམས་ཅད་རྫོགས་པར་གསན། གསེར་སྲང་བརྒྱད་བརྒྱ་འབུལ་བར་དམ་བཅས་ཏེ། ཕྱེད་ཕྱག་ཏུ་ཕྱིན་པ་ལ་སྤྱན་སྔ་གཤེགས་པས། བཞི་བརྒྱའི་ཚབ་ཏུ་དགུང་ལོ་དོན་གཉིས་ལ། ལམ་པའི་གཙུག་ལག་ཁང་གི་རྨང་བཏིངས་ཏེ་རྫོགས་པར་གྲུབ། སྐུ་གསུང་ཐུགས་ཀྱི་རྟེན་སྔ་ཕྱི་དཔག་ཏུ་མེད་པ་བཞེངས་པའི་གྲགས་ཆེ་བ་ལ། རབ་གནས་ཀྱི་དུས་སུ་སྤྱན་སྔ་པ་ལ་ཆོས་གསུངས་པའི། འཇམ་དཔལ་དཔའ་བོའི་སྐུ་ལ་སོགས་པ། རྒྱུད་སྦྱངས་མ་བདུན་དང་། རྣལ་འབྱོར་པས་རབ་གནས་མཛད་པ། པོ་ཏོའི་གསུང་འབྱོན། མཁའ་རུའི་ལྗང་སྐྱེས། བཙན་འགྲོའི་ཆུ་ཁོལ་ཞེས། རྟེན་རྟགས་ཐོན་གསུམ་དུ་གྲགས་པ་སོགས་རྟེན་མང་དུ་བཞེངས། སྤྱན་དང་མངོན་པར་ཤེས་པ་མངའ། ཡི་དམ་མང་པོས་ཞལ་གཟིགས། བདེན་གཉིས་ཀྱི་རྟོགས་པ་ཐུགས་ལ་འཁྲུངས། འགྲོ་དོན་རྒྱ་ཆེར་མཛད་དེ། སློབ་མ་རྟོགས་ལྡན་སྡིངས་པོ་བ་སྣུབ་ཆོས་འབར། དགེ་བཤེས་ལྷ་བཟོ། ཁྱུང་ཁམས་པོ་ཆེ། ཀློག་སྐྱ། དགེ་བཤེས་ཟར་པ། བྱ་འདུལ་འཛིན། དགེ་བཤེས་གནས་བརྟན་ལ་སོགས་པ་རྟོགས་པ་དང་། གཞན་ཕན་