[A:༧༢ན] དེར་ཀློག་སྐྱའི་ཞལ་ནས། ང་རྒས་པས་ཡ་གིར་མི་ཐོན། ཁྱོད་ཀྱི་ཟར་སྐྱོངས་གསུངས། ཟར་པའི་ཞལ་ནས། ང་ཡང་བླ་མའི་གདན་ས་དགའ་སྟེ། ངས་ཟར་བསྐྱངས་ཤིག་གསུངས། དེ་ནས་བྱ་ཡུལ་བ་ཆེན་པོས་ཀྱང་ཕེབས། སྔར་གྱི་ཞལ་བཀོད་རྣམས་སྙན་དུ་གསོལ་པས། གཞི་འདི་ལ་ཟན་ཀྱི་དགོས་པའི་དགོངས་པ་ཡིན་ཡོང་གསུངས་ཏེ། ཆས་རྐྱེན་ཐམས་ཅད་དང་། སོལ་བ་ཚུན་ཆད་དབུ་སྟོད་ནས་དྲངས་ཏེ་གདུང་ཁང་ཆེན་པོ་བཞེངས་སོ། །སྤྲུལ་པའི་སྐུ་བྱ་ཡུལ་བ་ནི། མདོ་ཏིང་འཛིན་གྱི་རྒྱལ་པོ་ལས། ཕྱི་མའི་ཚེ་ན་ཏིང་ངེ་འཛིན་པ་དག །ལྔ་བརྒྱ་ལས་ནི་མི་ཉུང་དེ་འབྱུང་སྟེ། །མདོ་སྡེ་མཆོག་འདི་རྒྱ་ཆེར་བཟུང་བ་ལ། །དེ་དག་སྔོན་དུ་འདྲེན་པ་གཞོན་ནུ་ཡིན། །ཞེས་ལུང་བསྟན་ཏེ། འཁྲུངས་ཡུལ་སྟོད་ལུང་གོ་ག་ལུང་གི་གྲོང་མཁའ་རོག གདུང་རུས་གཉོས། ཡབ་གཡུང་དྲུང་འབར། ཡུམ་སྟོད་ལུང་པའི་ལྕམ་སྲིང་ལྗང་ཟ་ལྕམ་བུ་སྟེ། ཡོས་ལོ་ལ་འཁྲུངས། དགུང་ལོ་བདུན་ལ་སྟོན་ལུང་པ་ཆེན་པོ་དང་མཇལ། ལོ་བཅུ་གཉིས་ལ་སྟོད་ལུང་ཚ་ཐོག་དགོན་པར། རྣལ་འབྱོར་པའི་སློབ་མ་སྒོམ་པ་བྱང་གྲགས་དང་། སྤྱན་སྔའི་སློབ་མ་སྒོམ་པ་ཡེ་ཤེས་རྒྱལ་མཚན་གཉིས་ལ་མཁན་སློབ་ཞུས་དགེ་ཚུལ་མཛད། མཚན་གཞོན་ནུ་འོད་དུ་བཏགས། དེ་ནས་སྟོད་ལུང་པ། མལ་གྲོ་ཟར་དུ་འབྱོན་པའི་ཕྱག་ཕྱིར་བྱོན། ལོ་བཅུ་ཞབས་ཏོག་ཚུལ་བཞིན་དུ་མཛད། ཐུགས་འཛིན་ཡངས་པས་བསླབ་སྤྱོད་གཞུང་ཆེ་ཆུང་རྣམས་ཚེགས་མེད་པར་ཐུགས་སུ་ཆུད་པར་མཛད། དེ་ནས་སྤྱན་སྔ་ཆོ་བ་ན་བཞུགས་པ་