[A:72a] der klog skya'i zhal nas/ nga rgas pas ya gir mi thon/ khyod kyi zar skyongs gsungs/ zar pa'i zhal nas/ nga yang bla ma'i gdan sa dga' ste/ ngas zar bskyangs shig gsungs/ de nas bya yul ba chen pos kyang phebs/ sngar gyi zhal bkod rnams snyan du gsol pas/ gzhi 'di la zan kyi dgos pa'i dgongs pa yin yong gsungs te/ chas rkyen thams cad dang / sol ba tshun chad dbu stod nas drangs te gdung khang chen po bzhengs so/ /sprul pa'i sku bya yul ba ni/ mdo ting 'dzin gyi rgyal po las/ phyi ma'i tshe na ting nge 'dzin pa dag /lnga brgya las ni mi nyung de 'byung ste/ /mdo sde mchog 'di rgya cher bzung ba la/ /de dag sngon du 'dren pa gzhon nu yin/ /zhes lung bstan te/ 'khrungs yul stod lung go ga lung gi grong mkha' rog gdung rus gnyos/ yab g.yung drung 'bar/ yum stod lung pa'i lcam sring ljang za lcam bu ste/ yos lo la 'khrungs/ dgung lo bdun la ston lung pa chen po dang mjal/ lo bcu gnyis la stod lung tsha thog dgon par/ rnal 'byor pa'i slob ma sgom pa byang grags dang / spyan snga'i slob ma sgom pa ye shes rgyal mtshan gnyis la mkhan slob zhus dge tshul mdzad/ mtshan gzhon nu 'od du btags/ de nas stod lung pa/ mal gro zar du 'byon pa'i phyag phyir byon/ lo bcu zhabs tog tshul bzhin du mdzad/ thugs 'dzin yangs pas bslab spyod gzhung che chung rnams tshegs med par thugs su chud par mdzad/ de nas spyan snga cho ba na bzhugs pa