[A:༧༢བ]ན། སྟོད་ལུང་པ་དཔོན་སློབ་གཉིས་ཀྱིས་མཇལ་དུ་བྱོན་པས་མངོན་ཤེས་ཀྱིས་གཟིགས་ནས་སྟོད་ལུང་པ་ལ། ཇོ་བོ་སྟོན་པ་རེ་སྐྱེད་འཁོར་འདི་ལྟ་བུ་ཡོད་པ། ཤེས་ཡང་ཡང་གསུངས་པས། བླ་མ་མཉེས་པར་དགོངས་ཏེ་ཕུལ། ལོ་བཅུ་གསུམ་ཞབས་ཏོག་ཚུལ་བཞིན་དུ་མཛད་པས། སྤྱན་སྔ་མཉེས་པའི་གསུང་མང་པོ་དང་། བྱིན་རླབས་ཞུགས་ཏེ། ནང་མ་གཅིག་ལ་སྡེ་སྣོད་གསུམ་དང་། རྒྱུད་སྡེ་བཞིའི་ཚིག་དོན་ཐུགས་ལ་འཁྲུངས། སྤྱན་སྔ་ལ་དཔོན་སློབ་ནཱ་ག་བོ་དྷི་དང་མཇལ་བ་བདེན་ནམ་ཞུས་པས། བཙུན་ཆུང་འདི་འདིར་བཅུག་པའི་ཆོས་མི་འདྲ་བ་གསུངས། ཕྱི་གཤེགས་ཁར་ངས་སློབ་དཔོན་ནཱ་ག་བོ་དྷི་དང་དངོས་སུ་མཇལ། ཆོས་མང་དུ་ཞུས། རྩ་བའི་བླ་མར་བྱེད་པ་ཡིན། ཁྱོད་རང་ཡང་གསོལ་བ་ཐོབ་དང་རྗེས་སུ་འཛིན་པར་འདུག་གསུངས། མདོར་ན་སྤྱན་སྔའི་ཡོན་ཏན་བུམ་པ་གང་བྱོའི་ཚུལ་དུ་མངའ་ཞིང་། སྤྱན་སྔ་སྙུག་གྲུམ་དུ་གཤེགས་ནས་སྐུ་གདུང་བཞུ་བའི་དུས། ཐུགས་ནམ་མཁའ་ལ་འོད་དང་བཅས་སྟེ་སྤྲུལ་སྐུ་ཆེན་པོའི་པང་པར་བབས་པ། ཕྱིས་བྱ་ཡུལ་གྱི་གདུང་ཁང་དུ་བཞུགས་སོ། །སྙུག་གྲུམ་དུ་སྐུ་མཚམས་ལོ་དགུ་མཛད། དེ་ནས་ཚོགས་བསྡུས་ཏེ། ཐོག་མར་བུལ་གྱི་ར་བ་དཀར་པོར་དགོན་པ་བཏབ། དགེ་འདུན་ལྔ་བརྒྱ་ཙམ་འདུས། དེའི་ཚེ་རྗེ་བཙུན་མ་སྒྲོལ་མ་ལ་སོགས་པ་ཡི་དམ་མང་པོ་ཞལ་གཟིགས། ནཱ་ག་བོ་དྷི་ལ་དངོས་སུ་ཆོས་གསན། དེ་ནས་གདུལ་བྱ་བསམ་གྱིས་མི་ཁྱབ་པ་དང་། དགོན་པ་འབུལ་བ་ཡང་མང་དུ་བྱུང་བ་ལ། བླ་མ་དང་སྒྲོལ་མས་ལུང་བསྟན་པའི་གནས་བྱ་