[A:༧༧ན]པ་མཛད་པས་སངས་རྒྱས་པདྨ་གར་དབང་ཞལ་མཇལ། དེ་ནས་བྱ་ཡུལ་དུ་སངས་རྒྱས་སྒོམ་པ་ལ་ཚོགས་ཆོས། ལྐོག་ཆོས་ཐམས་ཅད་རྫོགས་པར་མཛད། ཐུགས་དམ་བུམ་པ་དབུ་ཐོག་ཏུ་བཞག་པས་ཏིང་ངེ་འཛིན་ཁྱད་པར་ཅན་འཁྲུངས། ར་སྒྲེང་དུ་བྱོན་དུས་ཇོ་བོ་འཇམ་དཔལ་རྡོ་རྗེས་ཆོས་གསུངས། ལོ་བྱ་ཡུལ་གྱི་གདན་ས་ལོ་བཅོ་བརྒྱད་མཛད། དྲུག་ཅུ་རྩ་དྲུག་པ་འབྲུག་ལོ་ཟླ་བ་གཉིས་པའི་ཉི་ཤུ་ལ་གླང་ལུང་དུ་གཤེགས། འདི་ལ་སློབ་མའི་མཆོག་བཟང་པོ་དྲུག་ཏུ་གྲགས་པའི། རི་མེར་བ་ཆེན་པོས་ལྷོ་རི་མེར་གྱི་དགོན་པ་བཏབ། འོད་གསལ་སྒང་པ་ནི། འཁྲུངས་ཡུལ་འོན་བྲ་མ་ཐང་། དོན་སྟེང་པ་ལ་རབ་བྱུང་ཞུས། གྲོ་སར་རྣལ་འབྱོར་བྱང་སེང་ལ་འདུལ་བ་སོགས་བསླབས། ཕར་འབྱོན་པར་ཆས་པ་ལ། སྣ་ར་སྨན་རྩར་ཟེམ་ཕེབས་པ་དང་མཇལ་བས་མི་ཕྱེད་པའི་དད་པ་སྐྱེས། ལོ་དགུ་བསྟེན། འདིས་ཞོགས་ཀྱི་འོད་གསལ་དགོན་པ་བཏབ་བོ། སྨད་ཀྱི་བྱང་ཆུབ་སེམས་དཔའ་ཟླ་བ་རྒྱལ་མཚན། འདིས་དུམ་བུ་རིའི་དགོན་པ་བཏབ། གཞན་ཡང་དྭགས་པོ་སྤྱི་ཐེར་འབྲི་སྒང་པ། ཆོས་རྒྱལ་ཁམས་ལུང་པ་རྣམས་བྱོན། ཁམས་ལུང་པའི་འཁྲུངས་ཡུལ་ཉན་ཀ་ཀ་བ། གདུང་རུས་དབས། ཡབ་རྣལ་འབྱོར་མགོན་པོའི་སྲས་སུ་འབྲུག་ལོ་ལ་འཁྲུངས། བྱིས་པ་ནས་ཟེམ་རིན་པོ་ཆེ་ལོར་ཕར་འབྱོན་མར་འབྱོན་མཛད་པ་དང་མཇལ་རེས་ཀྱིས་སེམས་ཕྲོགས་པ་བཞིན་བྱུང་། ལོ་བཅུ་གཉིས་ལ་ཟེམ་བྱ་ཡུལ་དུ་བཞུགས་པ་ལ་རབ་བྱུང་ཞུས། མཚན་རིན་ཆེན་སེང་གེར་བཏགས། དེ་ནས་ཕྱག་ཕྱིར་ལོ་བདུན་བཞུགས། ཚོགས་ཆོས་རྣམས་རྫོགས་པར་གསན།