[A:77a]pa mdzad pas sangs rgyas padma gar dbang zhal mjal/ de nas bya yul du sangs rgyas sgom pa la tshogs chos/ lkog chos thams cad rdzogs par mdzad/ thugs dam bum pa dbu thog tu bzhag pas ting nge 'dzin khyad par can 'khrungs/ ra sgreng du byon dus jo bo 'jam dpal rdo rjes chos gsungs/ lo bya yul gyi gdan sa lo bco brgyad mdzad/ drug cu rtsa drug pa 'brug lo zla ba gnyis pa'i nyi shu la glang lung du gshegs/ 'di la slob ma'i mchog bzang po drug tu grags pa'i/ ri mer ba chen pos lho ri mer gyi dgon pa btab/ 'od gsal sgang pa ni/ 'khrungs yul 'on bra ma thang / don steng pa la rab byung zhus/ gro sar rnal 'byor byang seng la 'dul ba sogs bslabs/ phar 'byon par chas pa la/ sna ra sman rtsar zem phebs pa dang mjal bas mi phyed pa'i dad pa skyes/ lo dgu bsten/ 'dis zhogs kyi 'od gsal dgon pa btab bo/ smad kyi byang chub sems dpa' zla ba rgyal mtshan/ 'dis dum bu ri'i dgon pa btab/ gzhan yang dwags po spyi ther 'bri sgang pa/ chos rgyal khams lung pa rnams byon/ khams lung pa'i 'khrungs yul nyan ka ka ba/ gdung rus dbas/ yab rnal 'byor mgon po'i sras su 'brug lo la 'khrungs/ byis pa nas zem rin po che lor phar 'byon mar 'byon mdzad pa dang mjal res kyis sems phrogs pa bzhin byung / lo bcu gnyis la zem bya yul du bzhugs pa la rab byung zhus/ mtshan rin chen seng ger btags/ de nas phyag phyir lo bdun bzhugs/ tshogs chos rnams rdzogs par gsan/