[A:༨༣ན]རྨ་ཚོ་ལ་འདུལ་བ་གསན་ཅིང་མཁས་པར་གྱུར། དེ་ནས་རྒྱ་ཚ་ཞང་ཡེ་ལ་དབུ་ཚད་དང་། དཀར་ལོ་ཙཱ་བ་ལ་ཡོ་ག་བསླབས། འགོ་ནས་བཤད་ཉན་མཛད་པའི་སྐབས་སུ་དཔེ་ཆ་རྣམས་ཁམས་པའི་གྲྭ་པས་བརྐུས་པས། ཐུགས་སྐྱོ་བ་སྐྱེས་ཏེ་སྟོད་ལུང་པའི་དྲུང་དུ་བཀའ་གདམས་ཞུ་རུ་བྱོན་པས། ཡོན་ཏན་ཆེ་བའི་ང་རྒྱལ་གྱིས་དང་པོར་ཕྱག་མ་བྱས་པ་སོགས་སྤྱོད་པ་འགའ་ཞིག་ལ་རྟེན་ནས། སྟོད་ལུང་པའི་བཀའ་བཀྱོན་དྲག་ཏུ་མཛད་དེ་བསྐྲད། དེར་ལོག་ནས་བྱོན། སྟོད་ལུང་ཟམ་ཁར་བསླེབས་པ་ན་འགྱོད་པ་སྐྱེས་ཏེ། ཆོས་ཞུར་འོང་པ་ལ་དེ་ལྟར་བྱེད་པ་ང་མ་བདེན་སྙམ་དུ་དགོངས་པ་དང་། སྟོད་ལུང་པའི་ཞལ་ནས་ཉེ་གནས་ལ། ད་ཁོ་འགྱོད་པ་སྐྱེས་ནས་འདུག་གི་མར་གདན་དྲོངས་ལ་ཤོག་གསུངས། གདན་དྲངས་བཀུར་བསྟི་བྱས། དེར་བཀའ་གདམས་ཀྱི་གདམས་ངག་ཐམས་ཅད་ཡོངས་སུ་རྫོགས་པར་གསན་ནས་ཐུགས་དམ་གྱི་གཙོ་བོ་མཛད་དོ། །དེ་ནས་ཟུལ་ཕུར་བཤད་གྲྭ་བཙུགས་ཏེ་ཚོགས་ལོ་དགུའི་བར་དུ་བསྐྱངས། མདོ་རྩའི་ཊཱིཀྐ་ཆེ་ཆུང་དང་འདུལ་པ་སྤྱིའི་རྣམ་གཞག་མཛད། དེའི་ཚེ་བསམ་ཡས་དཔེ་དཀར་གྱི་བར་ཆད་རྩོམ་པའི་ཕྱིར་བཙུན་པར་སྤྲུལ་ནས་ཞབས་ཏོག་ལོ་མང་དུ་བྱས་ཀྱང་། འདུལ་བ་དང་འགལ་བའི་མཛད་པ་ན་བཟའི་སྤུ་ཕྱིར་བསྟན་ཏེ་གྱོན་པ་ཙམ་མ་གཏོགས་སྐྱོན་མ་བརྙེད་པས་དཔེ་དཀར་ཡང་དད་པར་གྲགས་སོ། །དེ་ལྟར་བཀའ་གདམས་ཀྱི་མན་ངག་ལ་ཉམས་ལེན་མཛད། བུ་ཆེན་འདུལ་བ་ལ་མཁས་ཤིང་འགྲོ་དོན་ཕུན་སུམ་ཚོགས་པ་བདུན་ཅུ་རྩ་དྲུག་