[A:༨༤ན]གཞོན་ལེགས་སོགས་བྱོན། སངས་རྒྱས་དབོན་སྟོན་ནི་འགྲན་གྱི་དོ་མེད་ཡིན་ནོ། །མེ་མོ་བྱ་ལ་ར་སྒྲེང་བཏབ་ནས་ལོ་དྲུག་ཅུ་རེ་གཉིས་སོང་ནས། ས་མོ་ཕག་ལ་རིན་ཆེན་སྒང་གི་གཙུག་ལག་ཁང་རྙིང་མ་བཞེངས། བླ་མའི་གདན་ས་ལ་སྒོ་བཏོན་གསུངས་ནས་བྱ་ཡུལ་ཕྱོགས་སུ་བསྟན། ཇོ་བོ་མི་གཡོ་བ། དམ་ཚིག་གསུམ་བཀོད། ཇོ་བོ་འཇམ་དཔལ་རྡོ་རྗེའི་ཞལ་གཟིགས། སྣེའུ་ཟུར་པ་དང་། བྱ་ཡུལ་བའི་གསུངས་བགྲོས་སྒང་བསོས་ནས། ལམ་རིམ་པོ་ཏི་བཞི་མ་དང་། གཉིས་མ་བྱ་བ་སངས་རྒྱས་དབོན་སྟོན་སོགས་ལ་གནང་བས། སངས་རྒྱས་དབོན་སྟོན་གྱིས་ཟིན་བྲིས་སུ་བཏབ། གདན་སར་ལོ་ལྔ་བཅུ་བཞུགས། གྱ་གཉིས་ལ་གཤེགས། སངས་རྒྱས་དབོན་སྟོན་ནི། སྒྱེར་སྒོམ་ཆེན་པོའི་སྤུན་ཟླ་སྒྱེར་བུ་མོ་སྟག་ཞེས་པ་དང་། ཡུམ་ཤ་མོ་རྡོག་གེའམ། ཤ་མོ་འདོ་ལེ་ཞེས་པ་ལ་སྲས་གསུམ་བྱུང་བའི་ཆེ་བ་ཡོན་བདག་ཡ་པོ་ཞེས་པ་དགེ་འདུན་དང་དཀོན་མཆོག་ལ་དད་པ་ཅིག་བྱུང་། བར་པ་སངས་རྒྱས་དབོན་སྟོན། ཆུང་བ་སློབ་དཔོན་སྟོན་པ། ཁོང་གིས་ཆོས་སྐྱོང་གྲི་གུག་ཞལ་གཟིགས། སངས་རྒྱས་དབོན་སྤྲུལ་སྐུ་བྱ་ཡུལ་བའི་སྐུ་སྐྱེར་བྱེད་པས། སྒྱེར་བསྒོམ་གྱི་ཞལ་ནས། ངས་བླ་མའི་གསུང་གཅིག་ལ་བརྟེན་ནས་བཙུན་ཆུང་འདི་ལ་བྱམས་པར་བྱས་པ་ཡིན་གསུང་། སངས་རྒྱས་དབོན་དགུང་ལོ་བཅུ་བདུན་ལ་དགེ་བཤེས་འབན་ཐང་པས་མཁན་པོ། དྭགས་པོ་བང་རིམ་པ་འདེའུ་བསྒོམ་གྱིས་སློབ་དཔོན་མཛད་དེ་རབ་ཏུ་བྱུང་། མཚན་གཞོན་ནུ་འབྱུང་གནས་སུ་བཏགས། ལོ་བཅུ་དགུ་ལ་སྐྱི་སྨད་