[A:48b]du byon/ lo bcu dgu'i bar tshul bzhin du bsten/ thun mong gi yon tan rnams rdzogs par mdzad/ nag tsho snye thang nas mnga' ris su 'byon khar/ jo bos bslab bya mang du mdzad de/ dam tshig gsum bkod kyi sku phyag tu bzung nas byin rlabs mdzad/ 'dul ba mdo rtsa dang / gsang ba 'dus pa'i rgya dpe dang / 'gro chos su thun mong ma yin pa'i spyan ras gzigs kyi sgrub skor sogs sbas chos nyi shu gnang ste lung bstan mang du mdzad/ jo bo rang gi sku mthe bong tsam seng ldeng la bris te ga'ur bcug nas gung thang pa'i dpung pa la btags/ mnyes mnyes rgya cher mdzad/ jo bo la gung thang pas kyang lan gsol te phyi bzhag rnams 'brom la bzhag rnal 'byor pas kyang nag tsho la bslab bya ji ltar mdzad pa'i tshul rnams/ snye thang du mdzad pa'i zhu lan dang / rnal 'byor pa'i bstod yig tu grags par gsal lo/ /de nas mnga' ris su byon nas lung bstan pa bzhin sgrub pa mdzad pas/ 'jam dpal rdo rje/ sgrol ma/ yi ge drug pa rnams zhal gzigs/ mngon shes kyang mnga' la/ de las slob brgyud phyag sor ba sogs byon tshul 'og tu 'chad do/ /lo chung legs shes ni 'khrungs yul mnga' ri pu hrang pa/ bal por thang bi ha ra bya ba rgyal pos bzhengs pa'i gtsug lag khang du rngog rin chen rgyal mtshan gyis zhus sna byas te mjal/ rdo rje 'byung ba/ gtsug dgu/ khams gsum rnam rgyal gyi dkyil chog bstod 'grel dang bzhi'i rgya dpe/ gsang 'dus kyi chos skor zhu ba'i rten du phul nas/ jo bo dang / lo tsA bas