[A:༡༠བ]གཅོད་པར་ཡང་དཀའ་བས་བརྟག་དཔྱད་བྱ་བའི་གཞི་ཞིག་ཡིན་པར་སེམས་སོ། །གཉིས་མེད་རྣམ་རྒྱལ་ཆུང་བ་ནི་བུ་སྟོན་རིན་པོ་ཆེ་ཉིད་ཀྱིས་བསྒྱུར་བ་དེ་ཉིད་དེ། འདི་ཡང་གསང་བ་འདུས་པའི་རྒྱུད་དུ་མི་རུང་སྟེ། གསང་བ་འདུས་པའི་རྒྱུད་རྣམས་ནི་གདུལ་བྱ་འདོད་ཆགས་ཅན་གཙོ་བོར་འདུལ་བའི་ཆེད་དུ་གསུངས་པ་ཡིན་ལ། རྒྱུད་དེ་ནས་ནི་རྣམ་སྣང་གཙོ་བོར་བྱས་པའི་དཀྱིལ་འཁོར་གཅིག་སྟོན་པ་ཡིན་པས་གདུལ་བྱ་གཏི་མུག་ཅན་གཙོ་བོར་འདུལ་བ་རྣམ་སྣང་སྒྱུ་འཕྲུལ་དྲ་བ་དང་རིགས་གཅིག་པས་དེའི་ཁོངས་སུ་བསྡུ་དགོས་པའི་ཕྱིར་རོ། །བུ་སྟོན་རིན་པོ་ཆེས་རྒྱུད་འདི་ལ་འགྱུར་མཛད་པའི་དགོས་པ་ཡང་ཐོག་མར་མཁན་ཆེན་ཐར་པ་ལོ་ཙཱ་བའི་ཕྱག་དཔེའི་ཁྲོད་ནས་བུ་སྟོན་རིན་པོ་ཆེས་གཉིས་མེད་རྣམ་རྒྱལ་བྱ་བའི་རྒྱུད་ཀྱི་དུམ་བུ་ཤོག་བུ་བཞི་ལྔ་གཅིག་གི་རྒྱ་དཔེ་རྙེད་ནས། དེ་ལ་འགྱུར་མཛད་ནས། དེའི་མཇུག་ཏུ། འདི་ལ་རྒྱུད་ཀྱི་དུམ་བུ་ལས་མེད་ཀྱང་སྔར་གྱི་གཉིས་མེད་རྣམ་རྒྱལ་ཞེས་གྲགས་པ་ཆེན་པོ་དེ་རྫུན་མར་རྟོགས་པའི་ཕྱིར་འདི་བསྒྱུར་ཞེས་བྲིས་པ་དང་། རྒྱུད་སྡེ་སྤྱི་རྣམ་ཆེན་མོར། འདི་མཁན་ཆེན་ཐར་པ་བའི་ཕྱག་དཔེའི་གསེབ་ནས་རྒྱ་དཔེ་ཤོག་ཡར་ལྔ་བྱུང་པ་ལ། ལེའུ་དང་པོའི་མགོ་ནས་ཤོག་བུ་གཅིག་མ་ཚང་བ་དང་། ལེའུ་བཞི་པའི་མགོ་ཡན་ཆད་དང་། མཇུག་གི་ཤོག་བུ་གཅིག་བྱུང་པ་ལ་ཁོ་བོས་བསྒྱུར་བ་ཡིན་ནོ། །འདི་ལ་དུམ་བུ་གཉིས་ལས་མེད་ཀྱང་། སྔར་གྱི་གཉིས་མེད་རྣམ་རྒྱལ་གྱི་རྒྱུད་དུ་འདོད་པའི་ལེའུ་བདུན་ཅུ་དོན་བདུན་ཡོད་པ་དེ་རྫུན་མར་ཡང་དག་པར་རྟོགས་པའི་དགོས་པ་ཡོད་དོ་ཞེས་གསུངས། ཕྱིས་སུ་ཀུན་སྤངས་ཆོས་གྲགས་དཔལ་གྱི་ཕྱག་ཏུ་དེ་བཞིན་གཤེགས་པ་ཐམས་ཅད་ཀྱི་མཉམ་པ་ཉིད་