[A:༣༠ན]གྲུབ་པའི་སློབ་དཔོན་ཆེན་པོ་དེ་མཐར་དཔལ་གྱི་རི་ལ་གཤེགས་ཤིང་། ལོ་སུམ་སྟོང་བཞི་བརྒྱ་བཞུགས་ནས་སྐལ་ལྡན་གྱི་དོན་མཛད་པར་གྲག་གོ །དེ་ཉིད་ཀྱིས་རྗེས་སུ་བཟུང་ཞིང་བྱིན་གྱིས་བརླབས་པ་ནི་དཔལ་འཕགས་པ་ཀླུ་སྒྲུབ་སྟེ། དེ་ཡང་སངས་རྒྱས་མྱ་ངན་ལས་འདས་ནས་ལོ་བཞི་བརྒྱ་ན་རྒྱ་གར་ལྷོ་ཕྱོགས་བེ་ཏའི་ཡུལ་དུ་བྲམ་ཟེ་ཕུན་སུམ་ཚོགས་པ་གཅིག་ལ་བུ་མེད་པ་ལས། ལན་ཅིག་རྨི་ལམ་དུ་བྲམ་ཟེ་བརྒྱ་ལ་ཆོས་སྟོན་དྲངས་ན་བུ་རྙེད་ཅེས་པའི་ལུང་བསྟན་བྱུང་། དེ་ནས་དེ་ལྟར་བྱས་པས་ཟླ་བ་བཅུ་ནས་ཁྱེའུ་ཞིག་བཙས་ཏེ་མཚན་མཁན་ལ་བསྟན་པས། མཚན་བཟང་མོད་ཀྱི། འོན་ཀྱང་ཞག་བདུན་གྱི་ཚེ་ལས་མེད་དོ་ཟེར། དེ་ལ་ཅིས་ཕན་དྲིས་པས། བྲམ་ཟེ་བརྒྱ་ལ་ཆོས་སྟོན་དྲངས་པས་ཟླ་བ་བདུན་དང་། དགེ་སློང་བརྒྱ་ལ་ཆོས་སྟོན་དྲངས་ན་ལོ་བདུན་ཐུབ། དེ་ནས་ཐབས་མེད་དོ་ཟེར། དེ་ནས་དེ་བཞིན་བྱས་ཏེ་ལོ་བདུན་དུ་ཉེ་བ་ན། བུའི་རོ་མཐོང་བ་ཕ་མས་མི་བཟོད་པས་གཡོག་དང་བཅས་ཡུལ་ཁམས་གཞན་དུ་བཏང་། དེས་ཀྱང་སོང་སོང་སྟེ་ཁ་སར་པ་ཎིའི་ཞལ་བལྟས་ནས་རིམ་གྱིས་ན་ལེནྡྲ་ན་ས་ར་ཧ་བཞུགས་པའི་སྒོ་དྲུང་དུ་སླེབས་ནས། དེར་སྙན་ངག་གི་རིག་བྱེད་སྟོན་པས། བྲམ་ཟེ་ཆེན་པོས་གསན་ནས་ནང་དུ་བོས་པ་ན། སྔར་གྱི་ཚུལ་རྣམས་ཞུས་པས། སློབ་དཔོན་ན་རེ། རབ་ཏུ་བྱུང་ན་ཐབས་ཡོད་གསུངས། ཕྱིས་རབ་ཏུ་བྱུང་བར་ཁས་བླངས། དེར་སློབ་དཔོན་གྱིས་འཆི་བདག་འཇོམས་པའི་དཀྱིལ་འཁོར་དུ་དབང་བསྐུར་གཟུངས་འདོན་དུ་བཅུག ཁྱད་པར་ལོ་བདུན་ལོན་པའི་ནུབ་