[A:44a]'dus sgron gsal las/ sangs rgyas kun gyi rim gnyis gnas kyi rgyas btab de ni klu sgrub las rnyed pa/ /khyab bdag dpal ldan rdo rje sems dpar btud de zla ba grags pas rim bzhin bshad/ /ces dang / paNDi ta skal ldan grags pas/ de ni dpal ldan klu sgrub las rnyed pa zhes smos te/ de ni dpal ldan klu sgrub kyi zhal snga nas kyi dngos kyi slob ma nyid du so sor ston gyi brgyud pas ni ma yin no zhes sogs bshad cing / do ha mdzod kyi Tikka 'ga' zhig las kyang / zla grags kyis klu sgrub las man ngag dngos thob cing / mthar klu sgrub kyis dbu sbyin par btang nas bde ba can du gshegs pa'i tshe/ nA ga bo dhi/ ArYa de wa/ zla grags gsum gyis gsol ba btab pas/ sku ci 'dra ba'i 'od cig snang bar byas nas/ gar yang ma rtog cir yang ma sems par/ /bcas bcos med pa'i rang bzhin nal mar zhog /ma bcos skye med rang rig byang chub sems/ /de ltar rtogs na sangs rgyas de rang yin/ /zhes gsungs pa'i gdams pa gnang zhes sogs dang / de'i tshe ArYa de was/ 'gro'o ArYa de wa 'gro/ /'od lus dag pa'i zhing du 'gro/ /song cig nA ga bo dhi song / /ri bya rkang can du 'phur te song / /song cig zla ba grags pa song / /dpal gyi ri la thogs med song / /zhes sogs gsungs shing / zla ba grags pas kyang / chad do zla ba grags pa chad/ /klu sgrub gshegs pas lam mkhan rgyun thag chad/ /ma bcos skye med chos kyi rgyun thag chad/ /yid la mi byed chos kyi rgyun thag chad/ /ces smras nas dpal ldan 'bras spungs kyi ri la bzhud ces sogs bshad