[A:༡༢༤བ]རིན་ཆེན་མཆོག །རྡོ་རྗེ་ཕྲེང་བ་ཀྲི་ཡ་ས་མུཉྩར། །ལེགས་པར་བཤད་པའི་དཀྱིལ་འཁོར་ཞེ་ལྔ་དང་། །ངན་སོང་སྦྱོང་བའི་དཀྱིལ་འཁོར་བཅུ་དང་གཉིས། །རྣམ་དག་ཟུར་བཀའ་ལྔ་བཅུ་རྩ་གཅིག་སྟེ། །སྨིན་བྱེད་དབང་གི་རྣམ་གྲངས་བརྒྱ་དང་བརྒྱད། །གྲོལ་བྱེད་ཁྲིད་ཀྱི་རིམ་པ་ཉི་ཤུ་བདུན། །སྙན་བརྒྱུད་ཟབ་མོའི་བྱིན་རླབས་ཉེར་གཉིས་ལྷག །རྗེས་སུ་གནང་བའི་བཀའ་སྲོལ་ཆེན་པོ་གཉིས། །རྗེས་གནང་ཟུར་བཀར་གྲགས་པ་བཞི་བཅུ་ལྷག །རྒྱ་བོད་མཁས་པའི་དགོངས་འགྲེལ་དང་བཅས་པའི། །ཟབ་རྒྱས་རྒྱུད་སྡེའི་བཤད་བཀའ་བཅུ་གསུམ་དང་། །སོ་ཐར་བྱང་སེམས་སྡོམ་པ་བསླབ་བྱར་བཅས། །སྒྲ་དང་སྙན་ངག་སྡེབ་སྦྱོར་དཀར་རྩིས་དང་། །བཀའ་དང་བསྟན་བཅོས་གླེགས་བམ་རབ་འབྱམས་ཀྱི། །དག་གསལ་ལུང་གི་བཀའ་དྲིན་དང་བཅས་པ། །མཐའ་ཡས་གདུལ་བྱའི་བསམ་པ་ཇི་ལྟ་བར། །སྩོལ་མཛད་ཆོས་ཀྱི་སྦྱིན་བདག་ཆེ་བ་པོ། །ཞེས་པ་ལྟར་རོ། །ཆོས་ཀྱི་རྣམ་གྲངས་དེ་དག་ཀྱང་ཡང་ནས་ཡང་དུ་སྟོན་པར་མཛད་པས་བསྟན་འཛིན་བསྐྲུན་པའི་གྲངས་ནི་བགྲང་བར་མི་སྤོབས་པ་ཙམ་བྱོན་ལ། དེ་ལྟའི་སྐབས་ནས་རྒྱུད་སྡེ་ཟབ་མོ་དང་འབྲེལ་བའི་ཐུགས་དམ་ཉམས་བཞེས་ཀྱི་རིམ་པ་ཡང་བསམ་གྱིས་མི་ཁྱབ་པ་ཞིག་རྟག་པར་མཛད་ཅིང་། ཁྱད་པར་བླ་མེད་ཀྱི་ལམ་གྱི་སྙིང་པོ་རིམ་པ་གཉིས་ཀྱི་ཏིང་ངེ་འཛིན་ལ་སྐད་ཅིག་ཀྱང་གཡེལ་བ་མི་མངའ་བས། གནས་སྐབས་སུ་བླ་མ་ཡི་དམ་ཆོས་སྐྱོང་སོགས་ཀྱིས་ཞལ་བསྟན་ཅིང་རྗེས་སུ་བཟུང་བའི་མཚན་མ་ཡང་བསམ་གྱིས་མི་ཁྱབ་སྟེ། དགུང་ལོ་ཉི་