[A:༡༢༨]
དེ་རྗེས་ཏའི་སི་ཏུ་ཁྲི་དཔོན་གྱི་གོ་སར་ཕེབས་པ་ཡིན་ལ། འདི་ཉིད་ནི། ཐང་ཡིག་ལས། ཡར་ཀླུངས་མཐིལ་ནས་རྣམ་སྨིན་བསྐྱེད་རྒྱལ་འབྱུང་། ། ཕག་གིས་ས་རློག་དབུས་ཁམས་ས་ཧོར་ཟ། ། བཙན་རྫོང་བརྒྱ་དང་རྩ་བརྒྱད་ཕྱོགས་སུ་འབྱུང་། ། ཞེས་པའི་ལུང་བསྟན་ཐོག་ཏུ་བབས་པ་སྟེ། འཇིག་རྟེན་ཐམས་ཅད་ཀྱི་བྱེད་པོ་གསེར་མངལ་ཅན་གྱིས་གནམ་ཀ་བ་མེད་པའི་སྒོ་ཕྱེ་ནས། རིན་པོ་ཆེ་སྣ་བདུན་སྔོན་དུ་འགྲོ་བ་ཅན་གྱི་གདོང་ལྔའི་དབང་པོའི་གད་རྒྱངས་ཟད་མི་ཤེས་པར་སྒྲོགས་པའི་ཁྲི་ཆེན་པོར་སྙིང་སྟོབས་དཔའ་རྟགས་ཀྱི་ལུས་སྟོབས་ཡོངས་སུ་རྫོགས་པའི་ས་སྲུང་དབང་པོའི་སྣར་རིགས་པ་དང་མི་རིགས་པའི་སྡེ་བཞིའི་སྤྱོད་ཚུལ་ལ་རྨོངས་པའི་དྲ་བ་མཐའ་དག་གཅོད་པའི་ཤེས་རབ་ཀྱི་སྤུ་གྲི་རྣོན་པོ་རང་བྱན་དུ་འཁོར་ཡང་ངོ་ཚ་དང་ཁྲེལ་གཞུང་སོགས་ཡ་རབས་དམ་པའི་སྤྱོད་ཚུལ་གྱི་འཛམ་བུ་ཆུ་བོའི་གསེར་གྱི་རྒྱན་བཟང་པོས་མཛེས་པར་སྤུད་པས་སྐྱེ་རྒུ་མཐའ་དག་གི་རལ་པའི་ཅོད་པན་གྱི་རྩེ་མོར་འགྱིང་པ་ལ་སྐྱེ་བས་ཐོབ་པའི་སྐལ་བ་མཆོག་གི་ལེགས་བྱས་ཀྱི་ཞགས་པ་རིང་པོ་སྟོང་སྤྱི་ཕུད་ཀྱི་རྒྱལ་ཁམས་སུ་ཁྲིམས་ཀྱི་ཐིག་དྲང་པོར་འདེབས་པའི་ས་ལ་སྤྱོད་པའི་མཐོ་རིས་ཀྱི་རྒྱལ་པོ་ཏའི་སི་ཏུ་བྱང་ཆུབ་རྒྱལ་མཚན་དགེ་བྱེད་ཅེས་པ་ཆུ་ཕོ་སྟག་གི་ལོ་ལ་སྐུ་བལྟམས། དགུང་ལོ་གསུམ་ལ་འབྲི་ཀློག་མཁྱེན་པ་དང་། དྲུག་ལ་ཆོས་སྐྱོང་བྱ་རོག་གདོང་ཅན་གྱི་རྗེས་གནང་གསན་པས་ཤིན་ཏུ་འགོ་བ་བྱུང་། དགུང་ལོ་བདུན་པ་ལ་སྤྱན་སྔ་ཆོས་བཞི་པའི་དྲུང་དུ་དགེ་བསྙེན་གྱི་སྡོམ་པ་མནོས། མཚན་བྱང་ཆུབ་རྒྱལ་མཚན་དུ་བཏགས། དགུ་པ་ལ་མཁན་ཆེན་ཚུལ་དར་བ་དང་། སློབ་དཔོན་པུ་རངས་པ་ལ་རབ་ཏུ་བྱུང་། བདེ་མགོན་གྱི་བསྙེན་པ་མཛད་པས་དངོས་གྲུབ་ཀྱི་མཚན་མ་ཁྱད་པར་ཅན་བརྙེས། དགུང་ལོ་བཅུ་བཞི་ལོན་པའི་ནག་པ་ཟླ་བའི་ཚེས་བཅུ་བདུན་ལ་ས་སྐྱར་འབྱོན་པའི་གྲབས་མཛད། ཟླ་བ་བཞི་པའི་ཟླ་སྟོད་ལ་སྣེའུ་གདོང་ནས་ཐོན་ཏེ་གླུར་བཞུགས་པའི་དགོངས་འཁོར་རྣམས་ཀྱིས་ཆང་