[A:141]gong ma'i lung gis gtsug na zla ba'i mchog/
thob pas stobs ldan 'gro skyabs gser can 'ga'//
dpa' mdzangs seng ge'i sder mos bsad pa na//
pad dkar mig cig gnyis pa sa 'dir snang //
de nas dwags po bka' brgyud kyi phyogs su mdo phyogs kyi bshad gra'i srol med pa gsar du btod pa'i ched du chos grwa chen po rtses thang btab/ phar tshad sogs bka' po ti du ma la rigs lam nas drangs pa'i bshad nyan btsugs/ de dang thel gyi sgom grwa gnyis ka la phun sum tshogs pa'i mthun rkyen sbyor ba/ bde bar gshegs pa'i sku brnyan du ma dang / gser gyi bka' 'gyur ro cog bzhengs pa/ ra sa 'phrul snang dang bsam yas kyis mtshon pa'i gnas chen khyad 'phags rnams la mchod 'bul sogs thar pa dang thams cad mkhyen pa'i lam bla na med pa bsgrubs pa'i tshogs gnyis kyi chu gter chen po dbyar mtsho ltar gyur pa'i mthus dkar nag gi las kyi 'bras bu chos thams cad rjen par 'char ba'i tshad ma'i srang la gzhal bas/ nag po'i 'bras bus cha tsam du yang ma gyur pas/ dge legs chu zla'i 'od dkar grangs med pa spros pas mngon par mtho ba dang nges par legs pa'i gang bu yongs su smin pas nor 'dzin gyi bu mo mngal khur gyis lci bar mdzad/
'di nyid gshegs rjes 'jam dbyangs gu shri chen po ni dpon bsod nams bzang po'i jo mo nyi ru ma dang mang nyam gnyis las snga ma la nyid dang bdag po shAka rin pa gnyis/ phyi ma la dpon rin rdor 'khrungs pa las/ 'jam dbyangs pa bla ma klu lung grags pa la klog yig bslabs/ chos bzhi grags pa rgyal mtshan gyi drung du dge bsnyen gyi sdom pa mnos/ slob dpon