[A:191]rgyal po 'di nyid chu pho rta'i lo la 'khrungs/ mtshan tho rol pa'i hur btags so/ / dgung lo bcu gsum lon pa'i tshe/ mgo dkar gyi dmag khri phrag tsam gyi steng du/ dmag rnams kyi sna drangs te mchongs pas pha rol gyi dpung tshogs mtha' dag 'jig brten phyi ma'i ltad mo dus gcig tu myong bar byas pa'i grags pas/ srin po'i rgyal po lang ka mgrin bcu mi'i yul du rgyu ba'i 'gran zla gnyis pa byas so/ / de skabs yul phyogs de dag mtha' 'khob las kyang ches mtha' 'khob tu gyur pa kla klo'i rgyal khams lta bur gnas pa las/ sog po'i yul gru gzhan dag tu/ thams cad mkhyen pa bsod nams rgya mtsho dang / gser gyi rgyal po mchod yon zung gcig la brten nas dam pa'i chos dar zhes pa'i chos kyi ming tsam thos 'dzin gyi rgyan du gyur pas yid dga' spro dang bcas te phyogs der phyag btsal bas dpral ba skrangs pa tsam du gyur cing / bstan pa'i dbu brnyes pa ni/ lha tho ri gnyan shal la gnyan po gsang ba byung ba bzhin no/ / me rta dgung lo nyer lngar slebs pa'i tshe/ yum grongs pa'i rkyen gyis mkho dgu'i 'byor pa mtha' dag mchog dman gyis skye bo rnams la sbyin par btang zhing / de yang tshe 'di'i snyan grags dang / rnam smin lan la re ba tsam ma yin par/ slob dpon zla grags kyis/ sbyin pa sbyin bya len po gtong pos gtong zhes gsungs pa ltar/ 'khor gsum bden stong gi rtsis zin pa'i 'phags chen dam pa'i rnam thar ro/ / byang 'phags rnams ni gzhan don du 'gyur tshe dmyal ba'i me 'obs kyang mtho ris kyi dga' ba'i tshal bzhin du 'jug par mdzad pa ni chos nyid de/ de skabs khar kha dang o rod phan tshun du g.yul rlabs po che bshams pa'i 'khrug long gis/ srog gcod pa'i sdig pa'i las rngam po ches/ ngan song mu mtha' med pa'i nags klung stug por bskyur ba'i sbyor ba la brtson pa dag la dmigs pa med pa'i snying rje chen po'i gzhan dbang