[A:74]gdugs ltar 'khor ba'i ngo mtshar gyi chu 'dzin 'phreng ba yid kyi skabs gsum pa'i lam du 'khrigs pa las/ ched du brjod pa'i dbyar skyes kyi rnga gsang phyogs bral gtsug phud can gyi rna bar sgrog pa'i 'u shang rdo dpe med bkra shis dge 'phel gyi gtsug lag khang bzhengs pa'i steng thog tu mchog gsum dam pa'i sku gsung thugs kyi rten rnams bzhugs/ bar gyi thog gsum du lo paN rnams klog pa thos bsam dang spong ba bsam gtan gyis dus 'da'/ 'og thog gsum du rje blon rnams sde bzhi'i sgo 'phar brgya phrag mngon par phye nas mchog dman kun la bde skyid kyi dpal 'byor char du bsnyil lo/ / smras pa/
sde bzhi'i cha shas yongs rdzogs rgyal thabs kyi//
'khor lo lha lam 'dzin mar rgyu ba'i 'od//
phan bde'i sa smos 'phreng ba rab bzhad tshe//
legs byas ga pur gsar pa'i thigs pa 'dzag/
gangs can kha ba'i ngos su sum rtsen mdangs//
dri bral gsar du 'phos pa'i sgyu ma'i grong //
sngon med gtsug lag gzugs brnyan ngo mtshar gtam//
skabs gsum pa rnams gleng ba'i ca co sgrog/
rtsod ldan sa 'dzin bgrod pa khrims gnyis kyi//
gzhom med rdo rje rtse brgyas bcom pa'i tshe//
rdzogs ldan gsar pa'i mgron de 'gugs pa'i slad//
phan bde'i gnyis 'thung sna zhags ring du rkyong //