[A:༧༤]གདུགས་ལྟར་འཁོར་བའི་ངོ་མཚར་གྱི་ཆུ་འཛིན་འཕྲེང་བ་ཡིད་ཀྱི་སྐབས་གསུམ་པའི་ལམ་དུ་འཁྲིགས་པ་ལས། ཆེད་དུ་བརྗོད་པའི་དབྱར་སྐྱེས་ཀྱི་རྔ་གསང་ཕྱོགས་བྲལ་གཙུག་ཕུད་ཅན་གྱི་རྣ་བར་སྒྲོག་པའི་འུ་ཤང་རྡོ་དཔེ་མེད་བཀྲ་ཤིས་དགེ་འཕེལ་གྱི་གཙུག་ལག་ཁང་བཞེངས་པའི་སྟེང་ཐོག་ཏུ་མཆོག་གསུམ་དམ་པའི་སྐུ་གསུང་ཐུགས་ཀྱི་རྟེན་རྣམས་བཞུགས། བར་གྱི་ཐོག་གསུམ་དུ་ལོ་པཎ་རྣམས་ཀློག་པ་ཐོས་བསམ་དང་སྤོང་བ་བསམ་གཏན་གྱིས་དུས་འདའ། འོག་ཐོག་གསུམ་དུ་རྗེ་བློན་རྣམས་སྡེ་བཞིའི་སྒོ་འཕར་བརྒྱ་ཕྲག་མངོན་པར་ཕྱེ་ནས་མཆོག་དམན་ཀུན་ལ་བདེ་སྐྱིད་ཀྱི་དཔལ་འབྱོར་ཆར་དུ་བསྙིལ་ལོ། ། སྨྲས་པ།
སྡེ་བཞིའི་ཆ་ཤས་ཡོངས་རྫོགས་རྒྱལ་ཐབས་ཀྱི༎
འཁོར་ལོ་ལྷ་ལམ་འཛིན་མར་རྒྱུ་བའི་འོད༎
ཕན་བདེའི་ས་སྨོས་འཕྲེང་བ་རབ་བཞད་ཚེ༎
ལེགས་བྱས་ག་པུར་གསར་པའི་ཐིགས་པ་འཛག།
གངས་ཅན་ཁ་བའི་ངོས་སུ་སུམ་རྩེན་མདངས༎
དྲི་བྲལ་གསར་དུ་འཕོས་པའི་སྒྱུ་མའི་གྲོང་༎
སྔོན་མེད་གཙུག་ལག་གཟུགས་བརྙན་ངོ་མཚར་གཏམ༎
སྐབས་གསུམ་པ་རྣམས་གླེང་བའི་ཅ་ཅོ་སྒྲོག།
རྩོད་ལྡན་ས་འཛིན་བགྲོད་པ་ཁྲིམས་གཉིས་ཀྱི༎
གཞོམ་མེད་རྡོ་རྗེ་རྩེ་བརྒྱས་བཅོམ་པའི་ཚེ༎
རྫོགས་ལྡན་གསར་པའི་མགྲོན་དེ་འགུགས་པའི་སླད༎
ཕན་བདེའི་གཉིས་འཐུང་སྣ་ཞགས་རིང་དུ་རྐྱོང་༎