[A:487]nas kyi mdzad pa la gsum ste/ gzhi tshul khrims rnam par dag pa ji ltar nos pa'i tshul/ de la brten nas thos bsam la sogs pa ji ltar mdzad pa'i tshul/ gzhan don phrin las ji ltar mdzad pa'i tshul lo/ /dang po la so so thar pa'i sdom pa ji ltar nos pa'i tshul ni/ dgung lo dgu bzhes pa'i dus chos rje ye shes rgyal mtshan pas mkhan po mdzad/ chos rje sa bzang 'phags pa gzhon nu blo gros pas las kyi slob dpon dang / ka bzhi 'dzin pa dpal ldan seng ges grib tshod pa dang / bla ma kun dga' rin chen pa dang / mkhas pa'i dbang po g.yag ston sangs rgyas dpal gyis kha skong gi dge 'dun mdzad nas/ dge bsnyen dang / dge tshul kyi sdom pa rnam par dag pa nos nas nyes byas phra zhing phra bas kyang ma gos par spyan gyi 'bras bu ltar srung bar mdzad pa yin no/ /de ltar nyes pa phra bas ma gos pa de yang gzhan rkyen la brten pa'am/ rang gis kyang rtsol ba drag pos gnyen po bsten dgos pa ma yin par/ sngon bcom ldan 'das kyi spyan sngar dge slong 'ga' zhig tshur shog la sogs pas bsnyen par rdzogs pa na/ de ma thag tu bsnyen par rdzogs nas lo brgya lon pa lta bu'i spyod lam dang ldan par gyur to zhes pa dang tshul mtshungs par rab tu byung ma thag nas rang gi ngang gis nyes pas mi gos pa yin te/ slob dpon kun dga' legs pa'i gsung gis/ bla ma 'di btsun chung gi dus nas su gzhan dang mi 'dra ba cig bdog ste/ chos rje ye shes rgyal mtshan pa g.yas g.yon du chos dbar la 'byon pa'i phyag phyir bdag cag grwa pa rnams 'gro ba'i tshe/ lam bar sogs kyi gnas mal du phyi dro phebs pa'i dus su/ bdag cag grwa pa rgan pa rnams ni kha skom pa dang / gsus pa ltogs pas bza' btung gi rtsol ba ka byed kyang / khong pa btsun chung chung shos yin te/ phyi dro bza' btung gi spros pa mi byed par gnas mal du phebs nas/ khres po phog ma thag