[A:༤༨༧]ནས་ཀྱི་མཛད་པ་ལ་གསུམ་སྟེ། གཞི་ཚུལ་ཁྲིམས་རྣམ་པར་དག་པ་ཇི་ལྟར་ནོས་པའི་ཚུལ། དེ་ལ་བརྟེན་ནས་ཐོས་བསམ་ལ་སོགས་པ་ཇི་ལྟར་མཛད་པའི་ཚུལ། གཞན་དོན་ཕྲིན་ལས་ཇི་ལྟར་མཛད་པའི་ཚུལ་ལོ། །དང་པོ་ལ་སོ་སོ་ཐར་པའི་སྡོམ་པ་ཇི་ལྟར་ནོས་པའི་ཚུལ་ནི། དགུང་ལོ་དགུ་བཞེས་པའི་དུས་ཆོས་རྗེ་ཡེ་ཤེས་རྒྱལ་མཚན་པས་མཁན་པོ་མཛད། ཆོས་རྗེ་ས་བཟང་འཕགས་པ་གཞོན་ནུ་བློ་གྲོས་པས་ལས་ཀྱི་སློབ་དཔོན་དང༌། ཀ་བཞི་འཛིན་པ་དཔལ་ལྡན་སེང་གེས་གྲིབ་ཚོད་པ་དང༌། བླ་མ་ཀུན་དགའ་རིན་ཆེན་པ་དང༌། མཁས་པའི་དབང་པོ་གཡག་སྟོན་སངས་རྒྱས་དཔལ་གྱིས་ཁ་སྐོང་གི་དགེ་འདུན་མཛད་ནས། དགེ་བསྙེན་དང༌། དགེ་ཚུལ་ཀྱི་སྡོམ་པ་རྣམ་པར་དག་པ་ནོས་ནས་ཉེས་བྱས་ཕྲ་ཞིང་ཕྲ་བས་ཀྱང་མ་གོས་པར་སྤྱན་གྱི་འབྲས་བུ་ལྟར་སྲུང་བར་མཛད་པ་ཡིན་ནོ། །དེ་ལྟར་ཉེས་པ་ཕྲ་བས་མ་གོས་པ་དེ་ཡང་གཞན་རྐྱེན་ལ་བརྟེན་པའམ། རང་གིས་ཀྱང་རྩོལ་བ་དྲག་པོས་གཉེན་པོ་བསྟེན་དགོས་པ་མ་ཡིན་པར། སྔོན་བཅོམ་ལྡན་འདས་ཀྱི་སྤྱན་སྔར་དགེ་སློང་འགའ་ཞིག་ཚུར་ཤོག་ལ་སོགས་པས་བསྙེན་པར་རྫོགས་པ་ན། དེ་མ་ཐག་ཏུ་བསྙེན་པར་རྫོགས་ནས་ལོ་བརྒྱ་ལོན་པ་ལྟ་བུའི་སྤྱོད་ལམ་དང་ལྡན་པར་གྱུར་ཏོ་ཞེས་པ་དང་ཚུལ་མཚུངས་པར་རབ་ཏུ་བྱུང་མ་ཐག་ནས་རང་གི་ངང་གིས་ཉེས་པས་མི་གོས་པ་ཡིན་ཏེ། སློབ་དཔོན་ཀུན་དགའ་ལེགས་པའི་གསུང་གིས། བླ་མ་འདི་བཙུན་ཆུང་གི་དུས་ནས་སུ་གཞན་དང་མི་འདྲ་བ་ཅིག་བདོག་སྟེ། ཆོས་རྗེ་ཡེ་ཤེས་རྒྱལ་མཚན་པ་གཡས་གཡོན་དུ་ཆོས་དབར་ལ་འབྱོན་པའི་ཕྱག་ཕྱིར་བདག་ཅག་གྲྭ་པ་རྣམས་འགྲོ་བའི་ཚེ། ལམ་བར་སོགས་ཀྱི་གནས་མལ་དུ་ཕྱི་དྲོ་ཕེབས་པའི་དུས་སུ། བདག་ཅག་གྲྭ་པ་རྒན་པ་རྣམས་ནི་ཁ་སྐོམ་པ་དང༌། གསུས་པ་ལྟོགས་པས་བཟའ་བཏུང་གི་རྩོལ་བ་ཀ་བྱེད་ཀྱང༌། ཁོང་པ་བཙུན་ཆུང་ཆུང་ཤོས་ཡིན་ཏེ། ཕྱི་དྲོ་བཟའ་བཏུང་གི་སྤྲོས་པ་མི་བྱེད་པར་གནས་མལ་དུ་ཕེབས་ནས། ཁྲེས་པོ་ཕོག་མ་ཐག་