[A:498]so/ /de'i dus nub gcig mnal lam du/ gzugs 'di ltar yin gyi nges pa med pa'i sgra cig la/ bla ma kun dga' bzang po lam 'bras zhu na 'di na yar byon zer ba zhig byung bas/ der byon pas ri 'bor cig na/ dang ra sgo byang bstan rtsig pa khro le ba byas pa/ nang na yar rdo khrob se byas pa cig gi nang na khang pa sgo shar bstan cig 'dug pa'i skas cig la 'dzegs byon pas skas mgo na dge bshes sha rtsi smug se ba cig gis spos sna byas gdan drangs byon pas/ mtshams shig gi kha lhor bstan cig na/ bla ma sku bgres se ba ber thul 'dra ba bsnams pa cig dang mjal ba rmis so/ /de nas yang sa skyar phebs nas gsung ngag gsan par bzhed pa la chos rje dpal ldan tshul khrims pa la mnga' ba'i gsung ngag gi skor yongs su rdzogs par gsan pa/ chos rje ye shes rgyal mtshan pa ni bde bar gshegs/ mi nyag gi ston pa rin chen rdo rje bya ba cig yod pa ni/ mdo khams su gshegs pas/ da su drag snyam du dgongs pa na/ sngar chos rje dpal ldan pa'i gsung cig la/ lam 'bras bu dang bcas pa'i man ngag gi rtsad gcod pa la/ slob dpon chen po ye shes rgyal mtshan pa bas kyang / slob dpon buddha shrI ba ngos kyang mkhas pa cig 'dug gsungs pa snyan na bzhugs pa dang / bla ma dam pa dpal ldan pa bde bar gshegs pa la nye ba de'i tshe lam 'bras ma rdzogs pa'i dge bshes cig la/ lam 'bras kyi 'phro rnams slob dpon chen po ye shes rgyal mtshan pa dang / slob dpon buddha shrI ba gnyis ka la zhus shig gsungs pa gsan pa dang / chos rje buddha ba'i drung du gshegs pa'i dge bshes gcig dang gsung gleng byung bas/ chos rje buddha ba de dge ba'i bshes gnyen mtha' yas pa cig 'dug zer bas/ chos rje buddha ba'i drung du lam 'bras gsan par dgongs te/ byi ba'i lo la byang gi chu kha'i zhi dgon du byon pas/ sngar chos 'khor sgang du rmi lam du byung ba'i ri 'bor dang / dang ra dang / khang pa