[A:499]rnams ji lta ba bzhin du 'dug pa'i skas la 'dzegs byon pas/ skas mgo na slob dpon nyi ma zer ba/ sngar mnal lam du byung ba'i rnam pa ji lta ba bzhin byas pa cig gis spos sna byas byon pas/ mtshams shig gi dbus zhal lhor bstan cig na/ chos rje buddha ba ber thul rnying pa cig bsnams nas 'dug pa dang mjal bas/ sngar gyi mnal lam dran pa dang / de nyid du dad gus bsam gyis mi khyab pa byung bas/ lus nyams mnan gyis mi non pa lta bu byung yang / thugs dran 'dzin chen po mdzad pas non tsam byung / de nas mtshams de'i shar 'gug cig na bzhugs gdan cig mdzad 'dug pa la bzhugs nas 'phros gtam dang zhus gnang mang du byung ngo / de nas zhi dgon du byi lo'i 'phro dang glang lo ste lo gnyis bzhugs nas lam 'bras kyi gzhung khrid tshar bar gsan/ stag lo la chos rje buddha bas sa skyar byon nas/ sa skya sa bzang gnyis su zla ba dgu bzhugs zhes mus chen gsung / paN chen grags rgyal dang chos dpal bas zla ba bcu gcig bzhugs par bshad/ de'i bar la gsung ngag rin po che lam 'bras bu dang bcas pa la sogs pa chos rje buddha pa nyid la mnga' ba'i gdams ngag thams cad yongs su rdzogs par gsan te/ de yang lam 'bras dang 'brel pa'i dbang / bshad pa nyams khrid/ gegs sel la sogs pa man ngag phra mo tshun chad ma lus par gsan cing / stan thog gcig gi steng du khrid zla ba dgu nyams len mdzad/ /lam rtags rnams rdzogs par shar/ de dus chos rje buddha ba'i zhal nas khrid 'jur bo 'di lta bu byas pa la/ gnas sbyong 'jam pa ma byung ba sdig shas shin tu chung ba'i rtags yin gsung / de ltar nyams su blangs nas/ nyams su myong ste/ snyan brgyud bzhi'i gdams pa yin no/ /de bzhin du lam skor rnams dang / zhar byung gi man ngag dang bcas pa yongs rdzogs gsan zhing / gzhan yang zab lam rdo rje'i rnal 'byor sbyor ba yan lag drug pa'i khrid/