[A:520]par gyi thig le dwangs pa'i dbus/ /rnal 'byor gyi dbang phyug sa skya pa/ /zhes sogs tshig rkang bdun yod pa rje lha mchog pa'i bar snyan brgyud yin zhing / lha mchog pas nub kyis dogs nas ri mo'i bkod pa dang / gong gi snyan brgyud kyi gsung de dag dang / rje skal ldan gyi 'dren mchog kun dga'i mtshan/ /gnas mgron la g.yu thog tu byon pa'i tshe/ /zhes sogs kyis gsal byed mdzad/ de dag gi don rgyas par mkhas pa'i dbang po dpal ldan don grub kyis mdzad par blta'o/ /de nas gsung ngag bshad pas chog par dgongs nas/ de man chad gsungs pas/ gsung ngag rin po che lam 'bras bu dang bcas pa yongs su rdzogs pa tshar brgyad cu gya gsum tsam song / de'ang phyi la gsang se mdzad nas shAka bzang sku 'bum du tshar brgyad/ de min yongs grags dang lo 'ga' yar tshar gnyis gnyis sogs bldab pa tshun brtsis pas so/ /cig car ba'i lam gyis bkrir rung ba rnams la rang rang gi smin byed sngon du song nas/ lam skor gzhan cha lag dang bcas pa/ gzhan yang sbyor drug /rim bzhi/ rtsa dbu ma/ bde mchog rim lnga/ gsang 'dus rim lnga/ spros med/ 'jigs byed rwa khrid sogs rdzogs rim gyi khrid bsam gyis mi khyab pa gnang ba yin no/ /'dir cig car ba zhes pa yang lam thun mong ba sngon du ma song yang / smin byed kyi dbang sngon du song nas/ bskyed rim dang rdzogs rim gyi lam nyams su len pa la zer gyi gzhan 'dod pa ltar gyi cig car ba ni ma yin no/ /yang 'bring mtshams kyi ri bo sgang zhes par lam 'bras gsungs pa'i tshe/ nub cig mnal lam du khang pa bzang po cig gi nang zhal shar bstan cig na rje sa chen yab sras gsum gyi sku shin tu mtshar ba 'od dang 'od zer gyi rang bzhin dang / chos rje sa paN gyi sku de tsho las cung zad mog pa cig bzhugs 'dug pa rmis zhes gsungs so/ /de ni bla ma yab sras gsum gyi gsung rab