[A:530]pa rdzogs pa dang / gsang 'dus lugs gnyis/ rim bzhi/ rim lnga/ rtsa dbu ma/ bde mchog dkar po/ bde mchog snyan brgyud la sogs pa 'khor lo bde mchog rdzogs rim gyi skor rnams dang / gshin rje gshed dmar lha lnga'i rdzogs rim shin tu spros med/ 'jigs byed rwa khrid sogs rdzogs rim gyi skor bsam gyis mi khyab pa lan grangs rab tu mang po dang / de dag gi sngon 'gro/ gsang 'dus/ gshed dmar/ 'jigs byed/ kye rdor/ bde mchog lo nag /ma hA mA ya la sogs pa bskyed rim gyi rgya gzhung du ma dang / rdo rje 'byung ba/ gsang ldan la sogs pa rgyud sde bzhi so so dang 'brel ba'i sgrub thabs kyi bshad pa tshan che ba mdzad/ de las gzhan pa'i rjes gnang so so ba mang po dang / sgrub thabs brgya rtsa/ rgya mtsho sogs rjes gnang gi skor mang po dang / rgyud 'bum dang / mdo sde'i lung dang / sngags kyi gzhung dang 'grel pa mang po dang / sa skya pa khu dbon lnga'i bka' 'bum sogs lung gi tshogs grangs med pa la sogs te/ mdor na dbang dang byin rlabs/ rgyud man ngag /rjes gnang dang rigs gtad/ sgrub thabs dang lung la sogs pa'i chos kyi 'khor lo nyin mtshan khor yug tu rgyun mi chad par bskor bar mdzad do/ /rgyal po la sogs pa 'gro ba phal mo che la/ mdo sde mdzangs blun/ las brgya pa/ bslab btus sogs las 'bras ston pa'i gzhung / rgyal sras lam bzang dang / blo sbyong sogs bstan bcos du ma yang yang gsung zhing / bstan pa la dad pa dang / las 'bras la yid ches par mdzad do/ /de ltar khor yug tu dam pa'i chos bshad pa la brten nas/ slob ma'i tshogs dang / sbyin bdag bsam gyis mi khyab pa byung zhing / de'ang cung zad smos na/ sa skya'i bdag chen chu mig pa grags pa blo gros/ gzhi thog pa blo gros dbang phyug /gzhi thog pa kun dga' blo gros/ chu mig pa kun dga'