[A:539]bla ma rjes rgyud sde so so nas gsungs pa'i dkyil 'khor lnga bcu nga bdun tsam gyi dbang bka' gnang / de dag gi sgrub thabs dkyil chog rnams kyi yig cha gang dang gang gi tho tshe dang / nye bar mkho ba sbyin sreg sogs phyag len rnam par dag pa/ dgon sde so so'i dge 'dun rnams la gnang zhing / sgrub dkyil gang byed sogs kyi dril chen po mdzad do/ /da lta mnga' ris skor gsum/ dbus gtsang khams gsum na sgrub mchod kyi phyag len gtsang ma rnam par dag pa ni glo bo kho na yin par 'dug ces grags pa ltar gyi don dang yang mthun par snang lags so/ /lan bar ma'i skabs 'dir bzhi sde pa drung nam rtses/ gu ge rgyal po khri nam mkha'i dbang po dang bka' bgros te/ gu ge'i mkhan chen chos nyid seng ge dpon slob rnams gdan 'dren par brdzangs/ chos rje rin po che dpon slob brgya tsam zhig pu hrangs su spyan drangs/ rgyal de 'ur zla ba gsum gyi bar bzhugs/ gu ge nas bla ma sprul sku ba sogs dang / pi ti nas mkhan po rin bsod/ mar yul ba'i dge bshes 'ga' sogs pu hrangs dang bcas pa'i dge 'dun mang po la/ dus 'khor mkha' 'gro rgya mtsho gur rigs bsdus sogs kyi dbang gnang / nya rtse rig tu dus 'khor sgrub mchod/ bzhi sde ru mkha' 'gro rgya mtsho'i sgrub mchod btsugs/ brtag gnyis/ sbyong rgyud/ dus 'khor 'grel chen sogs kyi bshad bka'/ gzhan yang 'gro ba mang po la sems bskyed chen po blo sbyong sogs chos 'khor rgya chen po bskor/ gu ge rgyal po rab tu byung zhing chos sde chen po gsar du btsugs/ de'i tshe bstan rtsis khyad par can mdzad pa'ang yod do/ /kha char jo bo'i drung du mar me'i phreng ba grangs med pa phul nas sangs rgyas kyi bstan pa dar ba'i smon lam mdzad/ skyid grong du yang de ltar mdzad do/ /de nas theng gsum gyi rjes ma yos lo la/ bstan pa'i sbyin bdag chen po a mgon bzang pos spyan