[A:540]drangs/ bka' 'gyur/ bstan 'gyur tshang mar bzhengs pa'i zhal da dang / gser gyi bka' 'gyur gyi 'phro tshar ba'i zhal da sogs 'dzad/ lhag pa rnams bton/ ma tshang ba rnams gsos nas dkar chag kyang mdzad/ gser gyi byams pa chen po/ lam 'bras brgyud pa/ kun rig gi gzhal yas khang sogs/ sku gsung thugs kyi rten du ma rab gnas mdzad/ thub bstan dar rgyas gling gi chos sder dge 'dun stong phrag tu langs pa 'dzugs pa'i zhal da dang / chos dpon 'jam dbyangs shes rab rgya mtsho bkod pa mdzad/ gzhan yang rab byung bsnyen rdzogs sems bskyed/ yo ga rdo rje rtse mo/ khams gsum rnam rgyal/ chos dbyings gsung dbang / yon tan kun 'byung sogs kyi dbang bskur/ rgyud dang bskyed rdzogs kyi bshad pa sogs mang du mdzad cing / mdo sngags kyi chos 'khor rgya chen po bskor nas gdul bya dpag tu med pa rnams smin grol gyi lam la 'god par mdzad pa yin no/ /sbyin bdag chen po dar ra kha che sogs sku mched kyi gser gyi ga'u lngas gtso byas gser srang lnga brgya la sogs pa'i 'bul ba grangs med pa phul/ de ltar mnga' ris glo bo'i phyogs nas bstan pa'i sbyin bdag a me dpal yab sras kyis lan gsum gyi bar du gdan 'dren zhus pas/ bstan pa dang sems can gyi don rgya chen po 'byung bar dgongs te/ mnga' ris phyogs la chag phebs te/ zab pa dang rgya che ba'i chos kyi 'khor lo yun ring du bskor/ de'ang glo bor dang por rab byung gi chos bka' tshang ba bzhir langs pa yang dkon pa la/ dge 'dun gyi sde khyad par du 'phags pa btsugs te/ da lta 'dul ba 'dzin pa stong phrag tu langs pa/ mdo sngags kyi bshad nyan sgom sgrub la sogs pa dbus gtsang dang 'dra bar yod pa dang / bstan pa spyi dang / bye brag tu dpal ldan sa skya pa'i bstan pa