[A:545] yul phyogs bkra shis pa'i thabs kho na la dgongs pa yin no/ /gzhan yang gong ma chen po grags pa 'byung gnas pas bya'i lor yar lungs sogs su gdan 'dren zhus nas/ dbus phyogs kyi dge ba'i bshes gnyen dpag tu med pa la chos kyi 'khor lo rgya chen po bskor ba sogs mdzad/ de'ang sne gdong du zla ba bdun bzhugs/ gong ma nyid dang thel gyi chos sgo ba/ rtse thang / gsang phu brag nag gi gdan sa pa/ dwags po chos rje bkra shis rnam rgyal ba la sogs phyogs kyi dge ba'i bshes gnyen grangs mang ba la sems bskyed/ rgyud sde bzhi dang 'brel pa'i dbang mang du bskur ba dang / brtag gnyis dang gur sbrags pa'i bshad pa dang / sa skya bka' 'bum gyi lung la sogs pa'i chos kyi rnam grangs rgya che ba mang du gsungs/ bde gshegs phag mo gru pa'i sku/ dus kyi 'khor lo/ bde mchog /chos dbyings gsung dbang rnams kyi gser sku chen po rdo rje phreng ba'i gtso bo gzhan rnams kyang gser sku bzhengs pa/ phreng ba'i bris sku tshang ba/ bka' 'gyur bstan 'gyur rnams kyi rab gnas rgyas pa lan gsum gyi bar du mdzad la/ de dus gong ma chen po'i sku rim du sne gdong rtse de nyid du/ dwags po bkra shis rnam rgyal/ chos rje dge ba rgyal mtshan sogs phyag phyir bkra shis pa'i 'jigs byed drug cu pa mdzad/ de dus kyi mchod dpon gu ge paNDi ta yin pas phyag len gyi tho dang mthong brgyud phyag len de nas so/ /gong dkar rin spungs sogs su yang yar phyin zla ba bzhi tsam thogs shing / dam pa'i chos kyis sems can rnams la phan pa rgya chen po mdzad do/ /rgyal ba'i gsang gsum gcig bsdus rdo rje 'chang / /mkhas kun dga' ba'i 'dren pa bzang po ni/ /gang 'dul sprul pa'i rnam rol dpag med kyis/ /mkha' khyab phrin las su yis brjod par spobs/ /'on kyang gling 'dir kun gyis gsal mthong ba'i/ /dpyod ldan