[A:546]dga' bskyed gtam gyi phul bzang po/ /sngon dang da lta'i mdzad pa'i legs dpyad mchog /skye ba brnyes dang bslab gsum bdud rtsis gtams/ /shes bya kun la bslab sbyangs mthar phyin dang / /bstan 'gro'i dga' ba mchog tu rgyas byed pa'i/ /sdom pa gsum dang 'chad pa'i nyi 'od kyi/ /phrin las bzang po'i dkyil 'khor 'dir shar to/ /zhes bya ba ni bar skabs kyi tshigs su bcad pa'o/ /de ltar 'chad pa'i sgo nas sangs rgyas kyi bstan pa gsal bar mdzad nas/ rtsod pa'i sgo nas gzhan gyis log par rtog pa bzlog pa yang / kha cig sngon gyi dus su dpal ldan chos skyong sems tsam gyi paNDi ta yin pas/ birWa pa'i rgyud gsum man ngag dang bcas pa'i dgongs pa sems tsam du bkral ba yin no zhes pa'i log par rtog pa byung ba/ lung rigs kyis sun 'byin par byed pa'i bstan bcos chen po rgyud gsum gnod 'joms rtsa 'grel mdzad/ yang phyis kyis kye rdo rje'i lus dkyil rgyud rgya gzhung gang nas kyang ma bshad pa'i rtog brtags yin no zhes pa'i log rtog 'jigs su rung ba lam dus blangs pa mthol bshags byed pa'i skabs byung ba de lung rigs man ngag gi sgo nas legs par sun phyung nas/ rgyud gzhung gi dgongs pa bla na med pa sgrub par byed pa'i bstan bcos chen po'i lus dkyil rtsod spong smra ba ngan 'joms zhes bya ba dang / lta ba ngan sel zhes bya ba gnyis mdzad do/ /gzhan yang bla ma gong ma'i lugs kyi bde kye gsang gsum gyi don ma rtogs pa dang / log par rtogs pa mtha' dag sun 'byin pa'i bstan bcos chen po legs bshad gnad kyi zla zer/ spring yig dbang po'i rdo rje/ de bzhin du dris lan sna tshogs kyi sgo nas log rtog zlog par byed pa'i bstan bcos du ma mdzad do/ /dpal ldan kun dga'i lung rigs lha dbang gis/ /rdo rjes log rtog lha min kun bcil nas/ /thub bstan skabs gsum rgyas par mdzad