[A:567]sgra'i e waM ni/ stong nyid mtshon par byed pa la/ rgyud thams cad du e waM gyi sgra gcig kho nar ma nges te/ e'i ming gi rnam grangs la/ nam mkha' dang / gsang chen dang / padma dang / chos 'byung dang / bha ga dang / bde ba chen po'i gnas dang / seng ge'i khri la sogs par brjod de/ e dang mtshungs par thams cad mkhyen pa'i ngo bo nyid ston par byed pa'i phyir/ bde ba chen po mtshon par byed pa la/ waM yig kho na'i sgrar ma nges te/ bde ba dang / chags pa dang / snying rje dang / thig le dang / lhan cig skyes pa dang / mchog mi 'gyur ba dang / de kho na nyid la sogs pas kyang waM dang mtshungs pa'i mi 'gyur ba'i bde ba ston pa'i phyir ro/ /de skad du/ dus 'khor rtsa rgyud las/ e dang gsang chen nam mkha'i khams/ /bha ga chos 'byung chu skyes dang / /seng ge'i khri bzhugs rdo rje can/ /waM dang rdor 'dzin rdo rje sems/ /dus kyi 'khor lo he ru ka /rgyud rnams kun gyi gnas su gsungs / /yul can du ma'i ming rnams dang / /sems can du ma'i bsam pa'o/ /zhes gsungs so/ /gnyis pa bris pa gzugs kyi e waM ni/ bcom ldan 'das kyis bde stong mtshon par byed pa'i yi ge gnyis bstan te/ yi ge 'di gnyis kyi gzugs sgrub pa ni/ dbus su a gri gug gi rnam pa lta bu dang / shar du e dbyug to'i rnam pa lta bu dang / lhor r-i tsheg drag gi rnam pa lta bu dang / nub tu l-i dgra sta'i dbyibs lta bu dang / byang du o thig le'i rnam pa lta bur bris pa'o/ /de nas dbus kyi a gri gug gi rnam pa lta bu la/ steng du nub kyi l-i dgra sta'am mthong gug lta bu byin pas mgor 'gyur ro/ /shar gyi dbyug to lta bu de byin pas a'i g.yon gyi phyogs su 'gyur te e'o/ /lho'i r-i tshig drag lta bu de byin pas zla tshes su 'gyur ro/ /byang gi o thig le lta bu byin pas klad kor du 'gyur ro/ /stong pa chen po yi ge lnga pa'i e waM gcig bsgrub pa'o/ /dus 'khor rtsa