[A:༥༨བ] ཡབ་ཇོ་བོ་དར་མ་མདོ་བཟང་གི་སྲས་སུ་ཤིང་ཕོ་རྟ་ལ་འཁྲུངས། རུས་ཞུགས་ཚང། ཁོ་རང་གི་ཞང་པོ་བཤེས་གཉེན་གྲོག་མོ་མཁར་པ་ལ་རབ་ཏུ་བྱུང། མཚན་རྡོ་རྗེ་སེང་གེར་བཏགས། རྒྱལ་བ་འོད་དཔག་ཏུ་མེད་པའི་སྤྲུལ་པར་བྱེད་ལ། སྔོན་ལོ་ཙཱ་བ་ཀ་བ་དཔལ་བརྩེགས་སུ་སྤྲུལ་ནས་བསྟན་པ་ཆེས་ཆེར་གསལ་བར་མཛད་ཅིང། འདིར་གདུལ་བྱ་བློ་དམན་པ་རྣམས་ཀྱི་ངོར། དང་པོ་ཤིན་དུ་བཀྲེན་པའི་ཚུལ་མཛད་དེ་ལོ་ན་སྤྱན་སྔ་ལ་ཆོས་གསན་དུས་ཡོས་སྦར་བ་རེས་གདན་གནོན་མཛད་ཀྱི་བཞུགས། དེ་ནས་བསོད་སྙོམས་མཛད་པའི་རྙེད་པ་གང་བྱུང། སྤྱིར་དགེ་འདུན་དང། ཁྱད་པར་སྤོ་ཏོ་བ་དཔོན་སློབ་ལ་དྲངས་པས་སྐུ་བསོད་སྐྱེས་པ་ལྟར་མཛད་དེ། གྲ་གྲྭ་པ་ཉིས་སྟོང་ཙམ་འཚོགས་པའི་རྒྱགས་ཁོང་རང་གིས་གནང། གནས་ངེས་མེད་དུ་བཤད་སྒྲུབ་ཟུང་འབྲེལ་དུ་མཛད། གཙོ་བོར་སྤོ་ཏོ་བ་ཡུན་རིང་དུ་བསྟེན། ཕུ་ཆུང་བ་དང། ཁམ་པ་ལུང་པ་ཆེན་པོ་སོགས་ལ་ཡང་ཆོས་གསན། སྤོ་ཏོ་བ་གཤེགས་ནས་ཐང་གྲོང་ལྟག་ཏུ་གཏོར་མ་མཛད་དུས། གཏོར་སྡེར་བྱ་རོག་གིས་ཁྱེར་ཏེ། གླང་ཐང་གི་ཤར་རི་དེའུ་དེའི་ཁར་གཞག་པས། དཔོན་ཤཱཀ་བྱ་བས་ཞབས་ཏོག་བྱས་ཏེ་དེར་ལོ་གསུམ་སྒྲུབ་པ་མཛད། ཞོལ་དུ་སྒྲུབ་ཆུ་ཡང་བྱུང། ཉིན་མཚན་དབྱེར་མེད་དུ་བྱང་ཆུབ་ཀྱི་སེམས་ཀྱི་ཏིང་ངེ་འཛིན་བསྒོམས་པའི་མདངས་ལ། ཀླུ་མོ་སྤུན་གསུམ་གྱིས་གླང་ཐང་གི་གནས་ཕུལ། དགེ་འདུན་གྱི་སྡེ་འཛུགས་པར་ཞུས། ཕྱིས་རི་དེའི་སྟེང་ནས་ཡར་འཕུར་ཏེ་ཐུགས་ཕྲེང་སྐྱུར་སར་ཁྲོན་པ་བྲུས། དབུ་ཞྭ་སྐྱུར་སར་བླ་བྲང་བྱས་ཏེ་དགོན་པ་བཏབ། སློབ་མ་མང་དུ་འདུས། བཀའ་གདམས་གཞུང་དྲུག་ལམ་སྒྲོན་སོགས་ལ་འཆད་ཉན་མཛད་ཅིང། བདག་གཞན་བརྗེ་བའི་བྱང་ཆུབ་