[A:༦༤བ] པ་ཞང་སྟོན་དང་ཁྲ་ཕུ་བ་ཆེན་པོ། དེའི་སློབ་མ་གཙན་དགོན་པ་སོགས་བྱོན་ཏེ་རྒྱས་པར་མ་སྤྲོས་སོ། གཉིས་པ་སྤྱན་སྔ་རིན་པོ་ཆེ་ནས་བརྒྱུད་པ། བཀའ་གདམས་གདམ་ངག་པ་བྱོན་ཚུལ་ནི། རྣལ་འབྱོར་གྱི་དབང་ཕྱུག་སྤྱན་སྔ་བ་ལ་སློབ་མའི་མཆོག་སྒོམ་བཞི། འགྲན་གྱི་དོ་མེད་གསུམ་དང། གཞན་ཡང་མཁའ་རུ་བ། རོམ་པོ་རྡོ་རྗེ། གཡེ་ནས་སྒྲེ་པ་ཆེན་པོ། ཞང་སྟོན་དཔལ་བརྩེགས། རྒྱ་རྩེ་སྒྲ་བོ། འཕན་
ཡུལ་
གྱི་སྒྲོ་ལག་པ་ཆེན་པོ། ཞང་ཀ་མ་བ་ཤེས་རབ་འོད། ཀུ་མ་ར་ཤཱཀྱ། སྐུ་སྲུང་སྟོན་པ། འདུལ་འཛིན་ལ་ཁུར་སྟོན་པ། མཆད་འུ་བ་ཆེན་པོ། དགག་དབྱེ་ཤེས་རིན་སོགས་མི་ཆེན་ཉི་ཤུ་རྩ་ལྔ་ཙམ་བྱོན་པའི། དགག་དབྱེ་ཤེས་རིན་གྱིས་ཉན་ཚར་གྱེས་ཀྱི་མཆོད་ཁང་བཞེངས། སྤྱིེར་གྲྭ་པ་བདུན་བརྒྱ་ཙམ་འཚོགས་སྒོམ་བཞི་ནི་ཟར་པ་ཕག་སྒོམ་རྡོ་རྗེ་ཡེ་ཤེས་ཀྱིས་མལ་གྲོ་ཟར་གྱི་མཆོད་ཁང་བཞེངས། རྒྱུག་པ་སྟོན་སྒོམ་གྱིས་ཀླུ་ཤོད་རྒྱུག་པའི་མཆོད་ཁང་སོགས་མཞེངས། མང་ར་སྒོམ་པ་བརྩོན་འགྲུས་འབར་གྱིས་ཐང་སྐྱའི་དགོན་པ་བཏབ། དབུ་རྩེ་གསར་མ་བཞེངས། རལ་པ་སེང་སྒོམ་གྱིས་ཀླུ་ཤོད་ངར་གྱི་མཆོད་ཁང་བཞེངས་སོ། འགྲན་གྱི་དོ་མེད་གསུམ་ནི། སྟོད་ལུངས་པ་ཆེན་པོ། བྱ་ཡུལ་བ་ཆེན་པོ། སྨྱུག་རུམ་པ་ཆེན་པོའོ། སྨྱུག་རུམ་པས་ཀླུ་ཤོད་མདར་མྱུག་རུམ་གྱི་དགོན་པ་བཏབ། སྟོད་ལུངས་པ་ཆེན་པོ་ནི། འཁྲུངས་ཡུལ་སྟོད་ལུངས་གསེར་ཕུག། དགུང་སྙིང་སྤྲེའུ་ལོ་པ། རབ་ཏུ་བྱུང་བ་ཁྱུང་པོ་ཇོ་བསོད་ལ་མཛད། མཚན་རིན་ཆེན་སྙིང་པོར་བཏགས། གཙང་ཕྱོགས་ལ་གཞོན་ནུ་ནས་མཚན་ཉིད་ཀྱི་སློབ་གཉེར་ལ་བྱོན་ནས། བླ་མ་སེང་གེ་སྒྲ་གཅན་འཛིན་བཟང་པོ་དང། པཎྜི་ཏ་འབུམ་ཕྲག་གསུམ་པ་སོགས་མཁས་པ་མང་པོ་ལ་མདོ་སྔགས་ཀྱི་གསན་སྦྱོང་རྒྱ་ཆེར་མཛད། རྩོད་པ་ཡང་བཟང། དེ་ནས་སྟོད་ལུངས་ཐག་མར་