[A:༢༢ན] མཉམ་ལ། དེར་ཡབ་རྒྱལ་པོ་དགེ་བའི་དཔལ་དང། ཡུམ་དཔལ་མོ་འོད་ཟེར་ཅན་གཉིས་ལ་སྲས་གསུམ་འཁྲུངས་པ། པདྨའི་སྙིང་པོ། ཟླ་བའི་སྙིང་པོ། དཔལ་གྱི་སྙིང་པོ་ལས། འབྲིང་པོ་ཟླ་བའི་སྙིང་པོ་ནི་བླ་མ་རྗེ་བཙུན་འདི་ཡིན་ཏེ། པཎྜི་ཏ་སའི་སྙིང་པོས་རིགས་ཕུན་སུམ་ཚོགས་པར་བསྟོད་པ་ལས། ཤར་ཕྱོགས་ཟ་ཧོར་ཡུལ་མཆོག་ན། དེ་ན་གྲོང་ཁྱེར་ཆེན་པོ་ཡོད། བི་ཀྲ་མ་ནི་པུ་རི་ཡིན། དེ་ཡི་དབུས་ན་རྒྱལ་པོའི་ཁབ། ཕོ་བྲང་ཤིན་དུ་ཡངས་པ་ཡོད། གསེར་གྱི་རྒྱན་མཚན་ཅན་ཞེས་བྱ། ལོངས་སྤྱོད་མངའ་ཐང་འབྱོར་པ་ནི། རྒྱ་ནག་སྟོང་ཁུན་རྒྱལ་པོ་འདྲ། ཡུལ་དེའི་རྒྱལ་པོ་དགེ་བའི་དཔལ། བཙུན་མོ་དཔལ་མོ་འོད་ཟེར་ཅན། ཡབ་ཡུམ་གཉིས་ལ་སྲས་གསུམ་མངའ། པདྨའི་སྙིང་པོ་ཟླ་བའི་སྙིང། དཔལ་གྱི་སྙིང་པོ་ཞེས་བྱ་འོ། རྒྱལ་བུ་པདྨའི་སྙིང་པོ་ལ། བཙུན་མོ་ལྔ་ཡོད་སྲས་ནི་དགུ། སྲས་ཀྱི་ཐུ་བོ་བསོད་ནམས་དཔལ། ད་ལྟའི་དུས་ན་མཁས་པ་ཆེ། དྷཱ་ན་ཤྲཱི་ཞེས་བྱ་བར་གྲགས། ཆུང་བ་དཔལ་གྱི་སྙིང་པོ་ནི། དགེ་སློང་བི་རྒྱ་ཙནྟྲ་ཡིན། འབྲིང་པོ་ཟླ་བའི་སྙིང་པོ་ནི། ད་ལྟ་བླ་མ་རྗེ་བཙུན་ཡིན། ཞེས་འབྱུང་བ་ལྟར་རོ། གཉིས་པ་ནི། ཆུ་ཕོ་རྟའི་ལོ་ལ་ཕོ་བྲང་གི་ཡང་ཐོག་ཏུ་འཁྲུངས་མ་ཐག། ཐོག་མཚམས་ན་ཨུཏྤ་ལ་སྔོན་པོ་སྐྱེས་པ་འཁོར་ཀུན་གྱིས་མཐོང་སྟེ། རྒྱལ་བུས་སྒྲོལ་མའི་ཞལ་དངོས་སུ་གཟིགས། སྐྱེ་བ་དཔག་ཏུ་མེད་པའི་ལྷ་ཡིན་པས་འབྲལ་མེད་དུ་རྗེས་སུ་འཛིན་པ་ཡིན་གསུངས། དགུང་ལོ་བཅུའི་བར་དུ་ཡི་གེ་དང། བཟོ་དང། གསོ་དཔྱད་དང། ལུགས་ཀྱི་བསྟན་བཅོས་རྣམས་ལ་ལེགས་པར་སྦྱངས། དགུང་ལོ་ཉེར་གཅིག་གི་བར་དུ་སྒྲ་དང། ཚད་མ་དང། སྒྱུ་རྩལ་དྲུག་བཅུ་རྩ་བཞི། ཟློས་གར་གྱི་བསྟན་བཅོས། སྙན་དངགས། མངོན་བརྗོད། རྩིས་ཀྱི་བསྟན་བཅོས་རྣམས་ལ་གཙོ་བོར་ལེགས་པར་སྦྱངས། བྲམ་ཟེ་ཛཻ་ཏཱ་རི་