[A:22a] mnyam la/ der yab rgyal po dge ba'i dpal dang/ yum dpal mo 'od zer can gnyis la sras gsum 'khrungs pa/ padma'i snying po/ zla ba'i snying po/ dpal gyi snying po las/ 'bring po zla ba'i snying po ni bla ma rje btsun 'di yin te/ paNDi ta sa'i snying pos rigs phun sum tshogs par bstod pa las/ shar phyogs za hor yul mchog na/ de na grong khyer chen po yod/ bi kra ma ni pu ri yin/ de yi dbus na rgyal po'i khab/ pho brang shin du yangs pa yod/ gser gyi rgyan mtshan can zhes bya/ longs spyod mnga' thang 'byor pa ni/ rgya nag stong khun rgyal po 'dra/ yul de'i rgyal po dge ba'i dpal/ btsun mo dpal mo 'od zer can/ yab yum gnyis la sras gsum mnga'/ padma'i snying po zla ba'i snying/ dpal gyi snying po zhes bya 'o/ rgyal bu padma'i snying po la/ btsun mo lnga yod sras ni dgu/ sras kyi thu bo bsod nams dpal/ da lta'i dus na mkhas pa che/ dhA na shrI zhes bya bar grags/ chung ba dpal gyi snying po ni/ dge slong bi rgya tsantra yin/ 'bring po zla ba'i snying po ni/ da lta bla ma rje btsun yin/ zhes 'byung ba ltar ro/ gnyis pa ni/ chu pho rta'i lo la pho brang gi yang thog tu 'khrungs ma thag/ thog mtshams na utpa la sngon po skyes pa 'khor kun gyis mthong ste/ rgyal bus sgrol ma'i zhal dngos su gzigs/ skye ba dpag tu med pa'i lha yin pas 'bral med du rjes su 'dzin pa yin gsungs/ dgung lo bcu'i bar du yi ge dang/ bzo dang/ gso dpyad dang/ lugs kyi bstan bcos rnams la legs par sbyangs/ dgung lo nyer gcig gi bar du sgra dang/ tshad ma dang/ sgyu rtsal drug bcu rtsa bzhi/ zlos gar gyi bstan bcos/ snyan dngags/ mngon brjod/ rtsis kyi bstan bcos rnams la gtso bor legs par sbyangs/ bram ze dzai tA ri