[A:༣༤བ] ཤི་བ་སྐད་དུ་དུར་དུ་སྐྱོལ། ང་ནི་འོད་གསལ་སེམས་ཀྱི་ལུས། འབྱུང་གནས་དེ་ལ་ཐིམ་ནས་འགྲོ། རྒྱ་བོད་གཉིས་སུ་བྱ་བ་བྱས། ཁ་བ་ཅན་དུ་གཅིག་གིས་ཆོག། ཅེས་གསུངས་ཏེ། མཁའ་སྤྱོད་དུ་གཤེགས་སོ། དེ་ནས་ཇོ་བོ་དཔོན་སློབ་བལ་པོའི་རྒྱལ་པོ་གྲགས་པ་མཐའ་ཡས་ཀྱིས་སྤྱན་དྲངས། ཇོ་བོའི་ཆིབས་གླང་པོ་ཆེ་མཐོང་སྨོན་བྱ་བ། རྒྱལ་པོ་ལ་གནང་སྟེ། ང་ཐང་འདིར་བི་ཧ་ར་ཞེས་པའི་གཙུག་ལག་ཁང་བཞེངས་པས། འབྱོར་པ་ཅི་དགོས་པ་དང། རྒྱ་གར་དང་བོད་ཀྱི་རབ་ཏུ་བྱུང་བ་ལ་ས་ཏྲ་འཛུགས་པའི་རྒྱུ་བྱིན་ཅིག་ཅེས་གསུངས་པས། རྒྱལ་པོ་དད་དེ་ཞབས་སྤྱི་བོར་བླངས། གང་བཞེད་པ་ཐམས་ཅད་བསྒྲུབ་པར་དམ་བཅས། སྲས་པདྨའི་སྙིང་པོ་ཕུལ་ནས་རབ་ཏུ་བྱུང། མཚན་ལྷའི་དབང་པོར་བཏགས། མཁས་པར་གྱུར་ནས་ཕྱིས་ཐང་བི་ཧ་རའི་མཁན་པོ་མཛད་དོ། དེ་ནས་ཨ་ཏི་ཤ་དཔོན་སློབ་རྣམས་བལ་པོའི་རྒྱལ་པོ་སྐྱེལ་ཐུང་བ་རྟ་པ་བརྒྱས་བསྐོར་བ་དང་བཅས་ཏེ་བལ་པོ་རྫོང་ལ་ཕྱགས་ཕེབས་པ་ན་དེར་ལྷ་བཙུན་པའི་རྟ་པ་སུམ་བརྒྱ་ཙམ་བསུ་བ་ལ་གོས་དཀར་པོ་འབའ་ཞིག་གྱོན། རྒྱན་ཐམས་ཅད་ཀྱང་དཀར་པོ་འབའ་ཞིག་བྱས། བློན་པོ་ཆེན་པོ་ལྷའི་དབང་ཕྱུག་དང། ལྷའི་བློ་གྲོས་དང། ལྷའི་ཤེས་རབ་དང། ལྷའི་སྲིད་འཛིན་ཞེས་བྱ་བ་བཞི་ལ། དར་མདུང་དཀར་པོ་ཐོགས་པ་བཅུ་དྲུག་བཅུ་དྲུག་གིས་བསྐོར། གཞན་ཐམས་ཅད་ལ་ཡང་བ་དན་ཆུང་ངུ་རེ་དང། ཆུ་དར་གྱི་གདུགས་ཉི་ཤུ་དང། པི་ཝང་དང་གླིང་བུའི་སྒྲ་སྙན་པོ་འཁྲོལ་བ་དང། དཔོན་གཡོག་ཐམས་ཅད་ཀྱང་ངག་མཐུན་པར་དཀོན་མཆོག་གསུམ་ལ་སྐྱབས་སུ་འགྲོ་ཞིང། བོད་དུ་སངས་རྒྱས་ཀྱི་བསྟན་པ་དར་བར་འགྱུར་རོ་ཞེས་པའི་ཁ་བརྡ་བཟང་པོ་བྱེད་པ་དང། ཨ་ཏི་ཤ་ལ་གནོད་
པའི་
ཕས་རྒོལ་ཐམས་ཅད་བདག་གིས་གཞོམ་