[A:༤ན] ཕུལ་ནས་གསོལ་བ་བཏབ་ཀྱང། ཞག་བདུན་ཕྲག་བདུན་དུ་ཆོས་མ་གསུངས་པར། བདུན་ཕྲག་ཐ་མ་ལ་ཝཱ་རཱ་ཎཱ་སིར་དབྱར་ཟླ་འབྲིང་པོའི་ཆུ་སྟོད་ཟླ་བའི་ཡར་ངོའི་ཚེས་བཞི་ལ་ལྔ་སྡེ་བཟང་པོ་ལ་བདེན་བཞིའི་ཆོས་ཀྱི་འཁོར་ལོ་བསྐོར་བའི་མཛད་པ་བསྟན་ཏོ། དེ་ནས་སྐུ་དངོས་ཀྱིས་གདུལ་བྱ་རྣམས་ལ་ཆོས་ཀྱི་འཁོར་ལོ་རིམ་གྱིས་བསྐོར་ནས་སྨིན་པར་མཛད་དེ། ཤིང་ཕོ་སྤྲེའུའི་ལོ་ལ་མྱ་ངན་ལས་འདའ་བའི་མཛད་པ་བསྟན་པར་བཞེད་དོ། དེ་ཡང་སྟོན་པའི་འཁྲུངས་ལོ་སོགས་ལ་བཞེད་ཚུལ་མི་འདྲ་བ་ཅུང་ཡོད་ཀྱང། འདི་ཇོ་བོ་རྗེའི་བཞེད་པ་ལྟར་ཡིན་ལ། ཆོས་རྗེ་ས་སྐྱ་པ་ནི་མེ་མོ་ཡོས་ལ་ལྷུམས་སུ་ཞུགས། ས་ཕོ་འབྲུག་ལ་བལྟམས། ཆུ་ཕོ་སྟག་ལ་སངས་རྒྱས། མེ་མོ་ཕག་ལ་གཤེགས་པར་བཞེད། དུས་འཁོར་ལས། མེ་ཕོ་རྟའི་ལོ་ལ་ལྷུམས་སུ་ཞུགས་པར་བཞེད་དོ། དེ་ཡང་ཀ་མ་ལ་ཤཱི་ལས། ཐུབ་པའི་མཛད་པ་བསམ་གྱིས་མི་ཁྱབ་ཀྱང། གཙོ་བོ་དང་གྲངས་ལ་དགའ་བ་རྗེས་སུ་གཟུང་བའི་ཕྱིར་མཛད་པ་བཅུ་གཉིས་སུ་བསྡུས། ཤེས་ཞེས་གསུངས་པ་ལྟར་མཛད་པའི་གཙོ་བོ་རྣམས་ཡིན་ལ། དེ་དག་ལ་ཡང་འདྲེན་ཚུལ་མི་འདྲ་བ་འགའ་རེ་འདུག་ཀྱང་རྒྱུད་བླ་མ་ལས་གསུངས་པ་ལྟར་ཡིན་ནོ། མཛད་པ་བཅུ་གཉིས་རྒྱས་པར་ནི་རྒྱ་ཆེར་རོལ་པ། མདོ་མངོན་བྱུང། འདུལ་བ་ལུང་རྣམས་ལས་འབྱུང་ཞིང། བོད་ཀྱིས་མཛད་པའི་ཆོས་འབྱུང་སོགས་རྒྱས་སྡུས་མང་དུ་སྣང་བ་རྣམས་ལས་ཤེས་ཤིང། འདིར་མངས་མང་པས་མ་སྤྲོས་སོ། དེའི་བཀའ་ཇི་ལྟར་བསྡུས་པ་ལ་གཉིས། ཐེག་པ་ཐུན་མོང་བ་དང། ཐེག་ཆེན་ཐུ་མོང་མ་ཡིན་པའི་བསྡུས་ཚུལ་ལོ། དང་པོ་ལ། བཀའ་བསྡུ་རིམ་པ་གསུམ་ལས། དང་པོ་ནི། དུས་སྟོན་པ་མྱ་ངན་ལས་འདས་