[A:༤༨ན] སྡོམ་གསུམ་ཁྱོད་ཀྱི་རྒྱུད་ལ་རྫོགས་པར་གནས། དེ་དག་ཀུན་གྱི་ལམ་རིམ་ལག་ལེན་རྣམས། རིམ་པ་བཞིན་དུ་ཁྲིད་དུ་བསྐྱངས་པ་ལས། ཀུན་ལ་ཐོགས་མེད་ཁྱོད་ཀྱི་བློ་ལ་རྫོགས། གཞན་ཡང་བསླབ་བཏུས་སྤྱོད་འཇུག་ལ་སོགས་པ། དོན་ཡོད་གོ་སྟེ་སེམས་ལ་ཕན་པའི་ཆོས། བརྒྱ་དང་བཅུ་གསུམ་དག་པར་ཁྱོད་ཀྱིས་བསླབས། གསང་བ་གཞན་ལ་བསྟན་པར་དཀའ་བ་ཡང། སྦས་པའི་ཆོས་རྣམས་ཁྱོད་ཀྱིས་ལོན་པར་མཛད། ཁྱོད་ནི་ཞུ་མཁས་ཁོ་བོ་སྣོད་ལ་རྟོག། ལྷ་རྣམས་ཀུན་ལ་བག་ཆགས་གཞག་པའི་ཕྱིར། སྒྲུབ་ཐབས་སྟོང་ཕྲག་ཉི་ཤུ་རྩ་བཞིའི་ཁྲིད། ཁོ་བོ་ཕྱོགས་འདིར་བོས་པའི་དགོས་པ་དང། སྡོམ་གསུམ་དོན་དུ་གཉེར་བར་འདོད་པ་ལ། སོ་སོར་ལག་ལེན་རིམ་པར་བཀྲོལ་བ་ལགས། ཤེས་ཞེས་སོགས་མང་དུ་གསུངས་སོ། ཁྱད་པར་དུ་རྒྱལ་བས་ལུང་བསྟན་པ་ཤིང་རྟ་ཆེན་པོ་གཉིས་ཀྱི་གདམས་པའི་བཅུད། རྒྱལ་བའི་བཀའ་བསྟན་པ་ཐམས་ཅད་འགལ་མེད་དུ་ཉམས་སུ་ལེན་པའི་ལམ་མ་ནོར་བའི་གདམས་ངག་ཨ་ཏི་ཤ་ལ་མངའ་བ་དེ། གཙོ་བོར་སྟོན་པས་ཐོབ་པར་མཛད་ཅིང། བཤེས་གཉེན་སྟོན་པའི་རྗེས་འཇུག་སྐུ་མཆེད་གསུམ་ལ་སོགས་པ་རྣམས་ལ་ཡང། བཀའ་གདམས་པ་ཞེས་མཚན་དུ་གྲགས་ལ། སྟོན་པས་མཛད་པའི་ལྷ་ཆོས་བདུན་ལྡན་ཆུང་བ་ལས། ངོ་མཚར་བཀའ་ནི་སྡེ་སྣོད་གསུམ་པོ་སྟེ། གདམས་པ་སྐྱེས་བུ་གསུམ་གྱིས་ཕྱུག་པ་ཡིན། བཀའ་གདམས་རིན་ཆེན་གསེར་གྱི་ཕྲེང་བ་ལ། འགྲོ་བ་གང་གིས་བགྲངས་ཀྱང་དོན་ཡོད་འགྱུར། ཞེས་པ་ནས། བདག་གི་བླ་མ་འགྲན་གྱི་དོ་མེད་འདི། ཚུལ་ཁྲིམས་གོས་ཅན་ལྟ་བའི་རྣལ་འབྱོར་པ། ཡེ་ཤེས་ལུས་ཅན་མཚན་དང་དཔེ་བྱད་ལྡན། ལོག་པའི་ཆོས་ལས་ངེས་པར་འདས་པ་ཡིན། ཨེ་མ་ཡ་མཚན་བསམ་གྱིས་མི་ཁྱབ་