[A:48a] sdom gsum khyod kyi rgyud la rdzogs par gnas/ de dag kun gyi lam rim lag len rnams/ rim pa bzhin du khrid du bskyangs pa las/ kun la thogs med khyod kyi blo la rdzogs/ gzhan yang bslab btus spyod 'jug la sogs pa/ don yod go ste sems la phan pa'i chos/ brgya dang bcu gsum dag par khyod kyis bslabs/ gsang ba gzhan la bstan par dka' ba yang/ sbas pa'i chos rnams khyod kyis lon par mdzad/ khyod ni zhu mkhas kho bo snod la rtog/ lha rnams kun la bag chags gzhag pa'i phyir/ sgrub thabs stong phrag nyi shu rtsa bzhi'i khrid/ kho bo phyogs 'dir bos pa'i dgos pa dang/ sdom gsum don du gnyer bar 'dod pa la/ so sor lag len rim par bkrol ba lags/ shes zhes sogs mang du gsungs so/ khyad par du rgyal bas lung bstan pa shing rta chen po gnyis kyi gdams pa'i bcud/ rgyal ba'i bka' bstan pa thams cad 'gal med du nyams su len pa'i lam ma nor ba'i gdams ngag a ti sha la mnga' ba de/ gtso bor ston pas thob par mdzad cing/ bshes gnyen ston pa'i rjes 'jug sku mched gsum la sogs pa rnams la yang/ bka' gdams pa zhes mtshan du grags la/ ston pas mdzad pa'i lha chos bdun ldan chung ba las/ ngo mtshar bka' ni sde snod gsum po ste/ gdams pa skyes bu gsum gyis phyug pa yin/ bka' gdams rin chen gser gyi phreng ba la/ 'gro ba gang gis bgrangs kyang don yod 'gyur/ zhes pa nas/ bdag gi bla ma 'gran gyi do med 'di/ tshul khrims gos can lta ba'i rnal 'byor pa/ ye shes lus can mtshan dang dpe byad ldan/ log pa'i chos las nges par 'das pa yin/ e ma ya mtshan bsam gyis mi khyab