[A:58a] tshul la gnyis/ spo to ba nas brgyud pa bka' gdams gzhung pa'i slob ma
byon
tshul/ spyan snga ba nas brgyud pa bka' gdams gdams ngag pa'i slob ma byon tshul lo/ dang po ni/ spo to ba la spyir slob ma mang du byon kyang grags che ba mtha'i ka chen brgyad / dbus kyi nyi zla zung gcig ces pa ltar na/ gtsang du ram snang gnyis/ gnyal du glang gnyos gnyis/ dol du 'be dog gnyis/ khams su bya phag gnyis/ dbus su glang shar gnyis rnams yin la/ bka' babs brgyad du byed na/ bya phag gnyis mi 'dren par/ byams snying rje byang chub kyi sems bdag gzhan brje nus pa'i bka'/ glang ri thang pa rdo rje seng ge la babs/ bka' 'gyur ro cog la gzhung bshad byed pa thams cad mkhyen pa'i ye shes la mnga' brnyes pa 'dra ba yod pa'i bka'/ shar ba pa yon tan grags la babs/ gsung rab thams cad skyes bu gsum gyi gdams ngag tu dril nas sman pa mkhas pas nad brtags te nad thog tu sman gtong ba 'dra ba yod pa'i bka'/ snang rde'u lhas pa ye shes rgyal mtshan la babs/ stong nyid kyi lta bas dngos po dang mtshan mar 'dzin pa thams cad 'jig nus pa yod pa'i bka'/ ram sding ma ba 'byung gnas rdo rje la babs/ rtsod pa paNDi ta'i rgol ba yang bzlog nus pa yod pa'i bka'/ dol pa shes rab rgya mtsho la babs/ bla ma la sangs rgyas dngos kyi mos gus rgyun chad med
pa yod pa'i bka'/ gnyal pa chos 'bar la babs/ dang tshugs mchog zung gcig la 'gran nus pa yod pa'i bka'/ gras pa gzhon nu 'od gras pa yon tan 'od yang zer
la babs/ rgyun du dkon mchog gi drung du mchod pa bkra lam me ba 'bul ba yod pa'i bka'/ dge bshes brag dkar ba la babs so/ de yang glang ri thang pa ni/ 'khrungs sa 'phan yul gnya' gong gser ma bshongs/