[A:10b] 'jam dpal gyis byin gyis brlabs shing/ dngos por 'dzin pa bzlog pa'i phyir/ ro mor bris pa'i ba la 'o ma 'jos te dge 'dun gyi 'tsho ba sbyar zhing/ rdo'i ka ba la phyag mi 'thog pa/ du ruShka'i dmag byung ba'i tshe rdo'i seng ge bskul nas dmag bzlog ste/ nam mkha' nas lhas/ dpal ldan zla ba grags pa yis/ stobs ldan rdo yi seng ge bskul/ du ruShka yi dmag
chen
bzlog/ shi rmas med pa ngo mtshar che/ zhes bstod pa des/ rtsa she'i 'grel pa tshig gsal / gsang 'dus 'grel pa sgron gsal te/ gsal ba rnam gnyis su grags pa dang/ 'jug rtsa 'grel la sogs pa'i bstan bcos mang du mdzad cing/ bshad sgrub kyi bstan pa rgyas par mdzad nas lo bzhi brgya'i bar du bzhugs so/ slob dpon 'di 'phags pa klu sgrub dngos kyi slob ma yin min la mkhas pa chen po kha cig/ jo bos/ klu sgrub slob ma zla grags yin/ zhes pa'i don chos kyi brgyud pa 'dzin pa'i mchog la dgongs kyi/ dper na dbang phyug lte bar na yod kyang phyogs glang chos grags shes zhes grags pa dang 'dra zhes gsung gsungs mod/ bka' brgyud 'di pa'i lugs kyi dngos slob tu bzhed de/ sgron gsal las kyang/ sangs rgyas kun gyi rim gnyis gnas kyis rgyas btab de ni klu sgrub las rnyed pa/ khyab bdag dpal ldan rdo rje sems dpar btud de zla ba grags pas rim bzhin bshad/ ces tshig zin 'byung ba dang/ gzhan yang gsung sgros mang du 'byung ngo/ de la slob dpon tsandra go mi la sogs pa slob ma mang du byon pa pas/ sras kyi thu bo rig pa'i khu byug che ba ni bram ze'i rigs las rab tu byung zhing/ gzhon nu'i dus nas zla ba grags pa'i spyan sngar mkhas par sbyangs nas grub pa brnyes te/ sangs rgyas kyi bstan pa gsal bar mdzad cing/