[A:14b] 'od kyis khyab par mdzad de/ gling de sngar bas bdun 'gyur gyis lo legs pa/ nad nyung ba sogs bkra shis par gyur pas gser gling pa thams cad sangs rgyas kyi bstan pa la dad de/ rgyal bu 'di rgya gar du chos slob tu gtang na legs zer bas/ rgyal bu dgyes te/ thog mar rdo rje gdan ston pa mngon bar byang chub pa'i gnas yin pas der byon/ srin po mchod pa byed pa dang
dus
'dzoms te/ gang zag yon tan can rnams kyang 'du ba las/ slob dpon ma hA shrI ratnA zhes pa mchog gi dngos grub brnyes pa zhig byon pa la/ dam pa gzhan las kyang de la lhag par dad de zhag bdun 'grogs nas slob dpon mi snang bar gyur/ der gnas thams cad du btsal kyang ma rnyed do/ rgyal bu rang gi yul du 'gro snyam pa la/ mdun du bu moo gnyis glu len te/ gnyen 'dun mdza' bshes mang po dang / yul dang khang khyim nor chen dang/ zas skom gos kyis longs spyod pa/ mya ngan skye bar 'gyur ba ste/ chos dang ring du 'gyur ba yin/ nor ma rnyed kyi tshong pa dag/ yul du stong par ldog pa 'dra/ zer bas nges par nga la zer snyam tsa na mi snang ngo/ der rgyal bu dgyes te chos skyong ma zhig yin pa la 'dri sa med kyang/ long yod kyi snyam ste/ lo bdun rgya gar du bzhugs nas bla ma mang po la chos gsan/ rigs pa bslabs mkhas par gyur/ rdo rje gdan du rgyal bu mchod pa byed cing/ chos skyong ma de dang 'phrad na snyam pa na/ rgan mo gcig na re/ skam sar chu ni drangs pa bzhin/ nyin dang mtshan mo 'das pa yis/ mi rnams tshe ni zad par byed/ rmongs pa long yod ma zer cig/ zer nas mi snang ngo/ der rgyal bus slob dpon ma hA shrI ratnA 'ba' zhig yid la byas pas/ rgyal bu'i rmi lam du slob dpon byon te