[A:17b] mthar phyin par bya ba'i phyir 'phags pa klu sgrub la bstan pa gtad de spyod pa la gshegs so/ de'i tshe mda' 'phen pa'i spyod pa mdzad de/ mda' legs par bsrangs na gnad du 'phog pa bzhin du/ sems can nyid gnas lugs kyi steng du bsrongs na grol bar rtogs te/ rtogs pa dang mchog brnyes so/ de nas sa ra ha ste mda' bsnun zhes grags la/ des rang gis rtogs pa'i don glur blangs pa/ da ho mdzod ces grags pa/ dam pa da ho yin la/ bod na da ho skor gsum mdzad ces zer yang/ rgyal po da ho dang/ btsun mo da ho ni/ bal po a sus kha g.yar nas byas par bal po na grags shes zhes chos rje bu ston gsung ngo/ mthar dpal gyi ri la gshegs te lo sum
stong
bzhi brgya bzhugs nas skal ldan gyi don mdzad ces 'byung ngo/ de'i tshe sangs rgyas mya ngan las 'das nas lo bzhi brgya song ba na 'phags pa klu sgrub byon te/ de'i rnam thar gong du bshad la/ des byin gyis brlabs pa ni dpal sha wa ra dbang phyug yin te/ kha gcig sa ra ha dang/ sha wa ra dbyug gcig tu 'dod pa ni mi 'thad de/ 'di dang po gar mkhan gyi rigs yin par bshad cing/ ri khrod dbang phyug ces kyang zer/ des glen mu yi sa la/ des rgyal po bi ma la tsantra'am/ dra ri ka pa dang/ slob dpon bram ze'i rigs Dem ki pa gnyis las/ dra ri ka pas/ slob dpon rdo rje dril bu pa la/ des rus sbal zhabs/ des dza landha ra pa/ des nag po spyod pa/ des gu hya pa/ des rnam rgyal zhabs la'o/ de rnams kyi rnam thar don du gnyer na gsang 'dus/ bde mchog gi chos 'byung du blta bar bya'o/ de nas te lo pa/ nA ro pa rnams las brgyud pa ring rgyud lta bu yin kyang / 'di dag dang 'og nas so so'i brgyud pa 'byung ba la yang ring rgyud/ nye rgyud/ byin brlabs kyi brgyud pa gsum ka 'byung mod/