[A:20a]dkyil 'khor du dbang zhus/ rgyud man ngag dang bcas pa dang/ ma hA mA ya'i dbang rgyud man ngag dang bcas pa gsan/ jo bo chen po'i bla ma gnas brtan byang chub bzang po la/ dpal kye ye rdo rje'i rtsa rgyud gdams ngag dang bcas pa mnos te thugs nyams su bzhes shing/ thams cad mkhyen pa gnyis pa lta bur grags pas/ gsang 'dus/ dgyes rdor/ ma hA mA ya/ dgra nag la sogs pa'i rgyud mang po dang/ nyi khri dang brgyad stong pa la sogs pa'i
mdo
mang po dang/ mdo sde rgyan la sogs pa'i bstan bcos mang po la 'grel pa mdzad nas/ dpal 'khor lo sdom pa'i rgyud la 'grel pa mdzad par rtsom pa'i tshe rmi lam du rdo rje phag mos zhal bstan nas kla klo'i skad kyis shin du sbas pa'i rgyud 'di gsal bar ma 'grol bar/ don zab mo nyams su long zhig ces bkag pa dang gnang ba'i lung bstan thob nas/ phyi ru nyan thos kyi spyod pa mdzad/ nang du don zab mo nyams su blangs pas grub pa brnyes pa yin te/ rdo rje gdan pas/ rgyal rigs spyod pa mthar phyin nas/ 'dul 'dzin gsang sngags dngos grub rnyes/ shAnti pa zhes bya ba yi/ bla ma de la phyag 'tshal lo/ zhes so/ de ltar nA ro pa dang/ shAnti pa gnyis kyi yon tan rdzogs par mnga' ba jo bo chen po yin kha/ lam yig las/ bi kra ma la shI la'i gtsug lag khang du ngo bo rje bzhugs pa'i dus/ nA ro pa byon pa la/ dge 'dun rnams kyis bsu ba rgya chen po mdzad/ nA ro pa'i zhal nas jo bo la/ da ni sangs rgyas kyi bstan pa'i bdag po khyed yin no gsungs/ jo bos/ khyed nyi ma dang 'dra ba bzhugs bzhin du kho bo srin bu me khyer lta bus 'jig rten gsal bar ga la nus zhus pas/ kho bo ni yun ring por mi sdod gsungs/ der zhag nyi shu tsam bzhugs/ lho phyogs su byon te zhag nyi shu tsam na/ gshegs pa'i gdung rus