[A:35a] par bya'o zhes dpa' bskyed pa dang/ thams cad rta las mi 'babs par gral sgor ram cig byas te/ dbus su a ti sha chibs mthong smon khyung gshog gi steng na bzhugs te/ sku 'khor paNDi ta gzhan la phan pa bzang po dang/ paNDi ta birya tsantra dang/ paNDi ta ye shes sgron me dang/ lo tsA ba gung thang pa la sogs pa rab tu byung ba'i rta pa sum cu rtsa lnga lngas bskor ba dbus su bzhugs pa la/ mi rta thams cad kyi mgo nang du 'dud cing/ blon po chen po bzhis dbus su 'ongs te/ sngon rgyal po yon mchod zhal 'dzom pa'i thog mar/ mkhan po bo dhi sa twa'i drung du/ blon po rig pa can rnams kyis zor ma'i glu blangs pa ltar/ blon po rnams kyis glu mdzad pa ni/ lo zhes bya ba grag stong snyan pa'i glu dbyangs lo/ a zhes bya ba skye ba med pa'i gnas lugs yin/ le zhes bya ba snang stong zung du 'jug pa'i glu/ ma zhes bya ba byams pas 'gro ba yongs la khyab/ lo de zhes pa de tsam thugs la gzhag 'tshal lo/ a lo la zhes bya ba skye ba med kyang gtam 'di gson/ khyed rgya gar yul nas byon pa'i mkhas grub paNDi ta/ yid bsam pa bzhin du 'grub pa'i nor bu rin chen bzhin/ bod gsol ba 'debs pa'i rten du byon pa bka' drin che/ zhes pa nas/ nged snying stobs chen po'i lha btsun drung nas 'ongs/ lus rkang pa'i mthil nas tshangs pa man chad 'di/ sems gus dang bcas te bla ma khyed la 'bul/ lha khyed kyi phrin las gang dgos nged kyis bsgrub/ rje rgyal po'i mnga' ris dpal gyi gtsug lag der/ thugs mi skyo mi mnyel rang yul lags pas 'byon par zhu/ lha btsun pa byang chub 'od de lha dbang brgya byin ltar/ 'khor nye dbang lta bu'i bkur gnas mdzad cing lha mer bzhugs/ lo a le la