[A:43a] 'dul 'dzin gzus rdo rje rgyal mtshan/ gnas brtan gser bso rnams byon pa las/ lha btsun pas jo bo chen po'i chos mang du mkhyen/ 'jig rten dbang phyug gi zhal gzigs/ mngon shes lnga thob/ lo chen rin bzang rigs kha che'i g.yu ri g.yu sgra bya ba/ yab gzhon nu dbang phyug/ yum cog ro shes rab brtan ma/ lcam sring bzhi yod pa'i gcen shes rab dbang phyug gis gcung rin chen dbang phyug tu sku skye ba bzhes/ dgung lo bcu gsum la mkhan po legs pa bzang po las rab tu byung ste/ mtshan rin chen bzang por gsol lo/ de'i mod la 'dul ba rgya cher 'grel thugs su chud/ de nas rgyal po'i bkas kha cher byon/ lo tsA mkhas par bslabs/ paNDi ta kA ra rnam gsum sogs rgya gar gyi paN grub du ma la gtugs/ theg pa mtha' dag gi chos la sbyangs/ bstan pa la bya ba rgya cher mdzad/ a ti sha dang pu rang du mjal te/ gu ge khri thang pas mdzad pa'i lo chen gyi rnam thar las/ dgung lo brgyad bcu rtsa bdun la mjal bar gsungs/ ji ltar mjal ba'i tshul gong du bshad la/ gzhan yang yo ga/gsang 'dus/ bde mchog sogs kyi dbang dang/ rgyud kyi bshad pa/ man ngag sogs theg pa gong 'og gi chos mtha' dag gis thugs tshim par mdzad/ rdo rje rnal 'byor ma'i byin brlabs gnang bas rtogs pa khyad par can 'khrungs pas lhag par dad de/ lha rten dang dpe ma gtogs pa gang yod phul/ jo bos dbus su lo tsA la 'gro dgos gsungs pas/ nga rgas pas mi nus zhus/ 'o na sgrub pa gyis gsungs pas mnyes te/ lo tsA ba chen po la paNDi ta'i bla ma drug bcu yod kyang/ jo bo nyid ma gtogs pa gzhan rnams kyis sgrub pa la