[A:46b] stong phrag brgyad brgyad song nas zhal gzigs/ jo bo lo dgu bsten/ rnal 'byor pa shes rab rdo rjes/ jo bo lo lnga bsten cing/ rngog legs she dang lhan du bzhugs te gsang phur sku gshegs so/ phyag dar ston pas kyang jo bo lo lnga bsten te/ snye thang du bod ston rnams kyis phar phyin gsung bar zhus pas/ thog mar paNDi ta'i lugs dang/ de nas jo bo nyid kyi bzhed pa ston pa bzhi'i sgo nas 'khrid tshul gsungs pa/ phyag dar ston pas zin bris su btab pas shin du legs pa cig byung/ phar phyin khams lugs mar grags te/ khong phar phyin la rtsal thon par gsungs/ gnyis pa chos brgyud 'dzin pa'i slob ma mchog byon tshul la gsum/ bshes gnyen ston pa byon tshul/ dge bshes gsang phu ba byon tshul/ nag tsho'i rjes slob byon tshul lo/ dang po ni/ de rnams kyi nang nas jo bo chen po'i chos kyi brgyud pa 'dzin pa'i mchog 'brom ston pa rgyal ba'i 'byung gnas yin te/ 'khrungs yul byang rtsa sgye mo phyogs su mdzad/ gdung rus 'brom gyi nang tshan brag gsum/ yab stag gsum sku gzher/ yum khu lde bza' gnyis kyi sras su shing pho 'brug la 'khrungs/ gzhur zhang po'i sar g.yung chos mgon la klog bslabs/ slob gnyer mdzad kyi yod pa'i dus/ rgyal gyi zhang chen po la dge bsnyen gyi sdom pa blangs/ de nas dgung lo bcu bdun bzhes pa la/ se btsun dbang phyug gzhon nu khams nas yar byon/ rgya gar du 'byon par bzhed de/ bal yul bar byon/ lo gcig na slar log pa dang mjal/ 'khrid par zhus pas sang red shog gsung bas/ tshong pa dang 'grogs te byon/ khams 'dan ma'i yul du lo hril po