[A:49b] gnas 'dir nga'i sprul pa 'byung zhes gsung ba/ bshes gnyen ston pa yin par bzhed do/ 'dir smras pa/ spyan ras gzigs dbang sngon tshe chos rgyal tshul/ ding sang rgyal ba'i 'byung gnas skur bstan cing/ 'jig rten dbang phyug srid mtha'i bar du ni/ 'gro ba'i don mdzad su yis dpag par nus/ der sangs rgyas kyi bstan pa a ti sha'i chos srol dri ma med pa rnams gtsugs te/ spyir las dang skal ldan gyi slob ma brgyad bcu tsam smin par mdzad cing/ khyad par du sku mched rin po che gsum jo bo nyid kyis snye thang du lung bstan te/ 'brom rje thub pa'i bstan pa lnga stong gnas/ 'on kyang bod du chos spyod ji ltar dar/ bdag gis bstan pa dkrongs bskyed byas pa yin/ da ni legs par gzhi bzhengs tshar ba yin/ chos 'di legs par bskyongs skyongs shig rgyal ba 'brom/ mtha' rgya byang nas bkyed cig snying stobs can/ lo rgyus rnam thar zung zhig khrel gzhung can/ pha gcig bu gcig yin no snying la soms/ shes zhes dang/ bdag gi bstan pa 'di ni khyod la gtad/ lo skor gcig gi bar du byang phyogs su/ tshon gyi char pa phob la gzhan don mdzod/ de nas khyod kyi yon tan ma lus pa/ gang zag gcig gis blang bar mi nus kyi/ las can brgyad bcur bgos la mtha' rgya bkyed/ gtso bor sprul pa'i sku mched gsum po la/ gzhung dang man ngag thun mong gsum byin la/ lhag chad med par rang gi gdan sa gtod/ gnas kyi gdan sar a mes chen po bskos/ de nas zhen cing chags pa ma byed par/ dga' ldan gnas su bdag gi drung du shog/ ces bshes gnyen ston pa bstan pa'i bdag por byin gyis brlabs shing/ chos kyi gdan sa sku mched gsum dang/ gnas kyi gdan sa rnal 'byor pa dang/