[A:137]babs te/ sa'i mdog 'gyur ba dang / de dag gi khrod nas me tog che ba rnams skye bo rnams kyis blangs te/ za ma tog la sogs par bcug nas rang rang gi gnas su khyer ba sogs ngo mtshar ba'i rtags bsam gyis mi khyab pa byung / de nas/ rgyud las/ mtshan nyid ldan pa'i bla ma 'das pa'i tshe/ /gdung ba'i sems kyis mchi ma byung gyur na/ /phra rab rdul dang mnyam pa'i grangs snyed kyis/ /bskal bar bsags pa'i sdig chen byang gyur te/ /ma 'ongs dus su zhabs drung skye bar 'gyur/ /gdan khri legs bshams steng du pur bzhag nas/ /chu gtsang argas sku khrus legs gsol na/ /bskal pa bye bar bsags pa'i sdig byang nas/ /zag med chos sku dri bral thob par 'gyur/ /zhes gsungs pa ltar/ der 'dus pa'i skye bo rnams mgon dang bral nas nyams thag cing bzod par dka' ba'i snying gi chu gter chen po phyur bur lud nas bzhin gyi nor 'dzin gyi khyon mtha' dag shel dkar bzhu ba'i rgyun lta bu'i mchi ma'i chu klung gis ci yang khyab kyang mig gi padma ngo mtshar ba'i cho 'phrul rnams la zim mer lta bzhin pa'i ngang nas zhag gsum song ba na gzhal du med pa'i 'jig rten gyi mchod sdong chen por gyur pa'i sku gdung rin po che de nyid la dri bzang gi chus sku khrus gsol zhing sman sna tshogs kyi lde gu dang bcas pa'i lha rdzas kyi na bzas sri zhu legs par bgyis te/ gdung sgrom gyi mchod rten du spyan drangs nas mdo sde phal po che'i gleng gzhi las byung ba lta bu'i mchod pa'i sprin phung bsam gyis mi khyab pa'i dbus su bzhugs su gsol/