[A:140]'jam dbyangs chen po dang rje 'di nyid kyi sku gdung lhan cig tu zhugs la 'bul ba'i cho ga'i zhabs tog /rje nyid kyi zhal slob mkhas pa'i dbang po dkon cog tshul khrims pas rgyud sde rin po che nas ji skad bshad pa bzhin legs par bsgrubs shing / de'i tshe'ang zhag mang po'i bar du nam mkha' g.ya' dag pa la/ 'ja' tshon gyi phreng ba 'khor yug tu bkram pa'i khrod na lha rdzas kyi me tog gi char nyi ma'i 'od 'grib pa tsam du babs pa sogs/ der 'dus pa'i skye bo thams cad kyis mngon sum du mthong ba'i ngo mtshar gyi dga' ston bsam gyis mi khyab pas mchog tu skal ba bzang por byas so/ /gdung khang zhal phye ba na rje btsun 'jam dbyangs chen po'i gdung rnams ni gdung log 'ba' zhig tu song zhing / lha sku ring bsrel kyang thor bu byon/ rje btsun rdo rje 'chang chen po nyid kyi gdung khang gi logs la rdo rje 'chang chen po sku mi tshad tsam dang / de'i dpung zur g.yon pa'i 'og tsam du stobs 'phrog nag po chen po'i sku bram ze'i gzugs rkang gang tsam rgyan dang skye mched thams cad shin tu gsal ba dud ris la 'khrungs shing / sku gdung rnams la'ang lha sku ring bsrel kha dog sna tshogs pa bsam gyis mi khyab pa byon/ de bzhin du rang rang gi mos pa'i dbang gis sku gdung gang du spyan drangs pa'i sa phyogs dang / gdung tshar bsgrubs pa'i tshe yang gong du brjod pa ltar/ me tog gi char chen po 'bab pa sogs ngo mtshar ba'i ltas mang du byung / sku gdung zhugs la 'bul ba'i nyin skye rgu thams cad kyi gtsug gi nor bu bdag chen chos rje kun dga' bsod nams grags pa rgyal mtshan dpal bzang pos gtso mdzad/