[A:141] gdan sa'i gzhir bzhugs kyi dge 'dun skye bo khri phrag tsam la gro ril sbrags ma mang ja nyung ja/ gang la gang 'os kyi 'bul ba/ gser dngul gos dar 'ba' zhig gis bsgrubs te thugs kyi dgongs pa rgya chen po yongs su rdzogs par byas/ de dang dus mtshungs su bal po'i kIrti pa dpon g.yog bdun dge sdings su spyan drangs te/ nang rten gser zangs las grub pa'i rdo rje 'chang chen po'i sku rgyab mtho bcu gsum shin tu ngo mtshar ba bzo phud sa skya pa chen po'i sku 'dra rkang gang ba zhig bzhengs te/ nang bzhugs kyang rje yab sras gsum gyi sku gdung la phal che ba gdung tshar bsgrubs pa rnams dang / gzhan yang bde bar gshegs pa'i sku gsung thugs kyi rten khyad par can mang po dang / bla ma gong ma rnams kyi sku gdung ring bsrel bsam gyis mi khyab pa dang bcas pa bzhugs shing / rab tu gnas pa'i cho ga rgyud sde rin po che nas bshad pa ltar gyis mnga' gsol nas/ dad can rnams kyi da lta mchod pa'i yul du rin chen sgang gi gtsug lag khang na bzhugs/ sku gdung lhag ma 'ga' zhig la rdo rje 'chang chen po'i gdung tsha khri tsho gnyis tsam rin po che'i na bzas spras pa bsgrubs te/ phyogs bcu'i bu slob dad ldan rnams kyi mchod pa'i rten phul lo/ /gzhan yang bla ma 'das pa'i lo zla tshes grangs dag /nges par bzung ste mchod pa byas gyur na/ /bskal pa bye bar bsags pa'i sdig bcom nas/ /shin tu mi bzad gshin rje'i grong las thar/ /zhes