[A:142]dang / gdugs dang rgyal mtshan rol mo 'phan la sogs/ /dung dang rnga chen rol mo sogs kyis mchod/ /mchod pa bcu dang bkra shis tshig bsgrags na/ /bskal pa ther 'bum bsags pa'i las dag nas/ /zag med chos sku thob nas gzugs sku yi/ /snang ba skyes nas srid gsum sdug bsngal sgrol/ /zhes dang / sngar bshad phyag 'tshal la sogs bcu byas na/ /de dang mtshungs pa'i dge ba 'ga' mi rnyed/ /mchod na 'khor los sgyur ba'i sa thob nas/ /skye bo mang po thar pa'i lam la 'god/ /ces dang / de tshe bla ma'i yon tan dran pa dang / /bka' drin mdzad pa rnam thar byin rlabs dang / /rnam pa cha lugs rjes su dran byas nas/ /dad mos gus shing shin tu gdung ba yis/ /thun mong mchog gi dngos grub 'dod pa'i blos/ /yang dang yang du gsol ba drag tu gdab/ /des ni ma 'ongs 'khor gyi gtso bor 'gyur/ /ces gsungs pa ltar/ rje nyid kyi snyan brgyud rgya mtsho'i mnga' bdag bstan 'dzin kun gyi gtso bor gyur pa/ rje btsun rdo ring pa chen pos rje btsun rdo rje 'chang chen po 'di nyid kyi bka' drin rjes su dran pa'i thugs kyi dgongs pa chos kyi dbyings su rdzogs pa'i slad du/ dpal kha'u brag rdzong gi ri khrod du phyi rten rnam rgyal mchod rten chen po/ nang rten gtsug lag khang gsar pa rmad du byung ba gsung ngag rin po che'i bla ma brgyud pa tshang ma sman sku rdo sku tshar gnyis/ ngo mtshar zhing byin rlabs kyi gzi 'od 'bar ba mchod pa'i sprin gyi phung po dang bcas pa bzhengs/ de dag la gtso bor gsol ba 'debs shing / rim gnyis kyi rnal 'byor lhur len pa'i sgrub sde'i rgyun 'khor ba